Nastaŭnica Anžalika Borys prajšła sudy i paklopy,
abaraniajučy prava na svabodu asacyjacyi.
Ministerstva zamiežnych spravaŭ Polščy hatovaje «pradać» Anžaliku Borys. Artykuł z takim skandalnym zahałoŭkam źmieščany na pieršaj staroncy hazety «Rzeczpospolita».
Vydańnie paviedamlaje pra sustreču staršyni Sajuzu palakaŭ Biełarusi ŭ źniešniepalityčnym viedamstvie Polščy, padčas jakoha Borys prapanavali admovicca ad staršynstva ŭ SPB.Jak paviedamlaje «Rzeczpospolita», Anžalicy Borys patłumačyli, što heta robicca na karyść hieapalityčnych intaresaŭ Polščy j dziela paciapleńnia polska‑biełaruskich dačynieńniaŭ. Sustreča, pavodle hazety, adbyłasia za niekalki dzion da vizytu ministra Radasłava Sikorskaha ŭ Biełaruś.
Sama Anžalika Borys admaŭlajecca ad kamentaroŭ da času pasiedžańnia Rady arhanizacyi, jakoje maje adbycca ŭ subotu.
«Było b vielmi prykra, kali b heta akazałasia praŭdaj — kaža pieršy staršynia SPB Tadevuš Havin, — Anžalika Borys mocna paciarpieła za svaju polskaść».
Vice‑ministar zamiežnych spravaŭ Polščy Andžej Kremer abviarhaje paviedamleńni hazety. Pavodle jaho, sustreča ŭ siadzibie MZS z Anžalikaj Borys nijakim čynam nie źviazanaja ź vizytam Radasłava Sikorskaha. «Heta poŭny absurd,» — tak vice‑ministar zareahavaŭ na publikacyju ŭ hazecie «Rzeczpospolita».
Staršynia parlamenckaj kamisii Sejmu Polščy pa mižnarodnych spravach Kšyštaf Lisek zajaŭlaje, što Anžalika Borys jak i uvieś Sajuz palakaŭ moža raźličvać na poŭnuju padtrymku ŭradu.
«Z taho, što ja viedaju, padčas razmovy ź ministram Martynavym hučaŭ zaklik Radasłava Sikorskaha pravieści demakratyčnyja vybary kiraŭnictva arhanizacyi» —skazaŭ Lisek u interviju hazecie «Rzeczpospolita».
Pavodle hazety, raspracavany scenar vybaraŭ kiraŭnictva SPB. Źjezd abudvuch «sajuzaŭ» pavinien adbycca ŭ listapadzie ŭ Bieraści. Novym kiraŭnikom budzie abranaja Alina Jaraševič, jakaja zadavalniaje abodva baki padzielenaj arhanizacyi. Na abjadnańni dvuch častak SPB nastojvaŭ biełaruski bok — piša vydańnie. Palaki chacieli, kab Miensk dazvoliŭ sajuzu na čale z Anžalikaj Borys dziejničać lehalna. Uzamien biełaruskija ŭłady prapanoŭvali Borys balatavacca ŭ parlament, ale biezvynikova.
Ci prymie SPB pad kiraŭnictvam Borys prapanovu MZS? «Małavierahodna» — kažuć polskija aktyvisty ŭ Harodni.
«Rzeczpospolita» pryvodzić historyju kanfliktu vakoł SPB. Jaho historyja pačałasia ŭviesnu 2005 hodu, paśla taho, jak biełarusija ŭłady admovilisia pryznavać abranaje na čarhovym źjeździe Sajuzu kiraŭnictva. Ministerstva justycyi admoviłasia pryznavać Anžaliku Borys z‑za, byccam by, surjoznych parušeńniaŭ padčas źjezdu. SPB byŭ padzieleny. Častka padparadkavałasia Anžalicy Borys, a častka zastałasia z tahačasnym kiraŭnikom Tadevušam Kručkoŭskim. U žniŭni ŭ Vaŭkavysku novym kiraŭnikom byŭ abrany Juzaf Łučnik.
* * *
Hałoŭnaja Rada apalnaha Sajuzu palakaŭ u Biełarusi nie pryniała prapanovy polskaha Ministerstva zamiežnych spravaŭ pra sfarmavańnie pracoŭnaj hrupy dla pieramovaŭ z łukašenkaŭskim adłamkam arhanizacyi na čale ź Juzafam Łučnikam. Heta adbyłosia niahledziačy na asabistuju prysutnaść na pasiedžańni pasła Polščy ŭ Biełarusi Chienryka Litvina,jaki nazvaŭ infarmacyi hazety «Rzeczpospolita» spekulacyjaj i zaklikaŭ Radu stvaryć hrupu dla pieramovaŭ z Łučnikam. Tym nia mienš, rašeńnie pra pieramovy nie prajšło, razam z tym była deklaravana hatoŭnaść da pieramovaŭ z uładami, «ale nia ź ichnymi maryjanetkami».
U subotu pra sytuacyju vakoł SPB vykazaŭsia premjer Polščy Donald Tusk. Jon abvierh paviedamleńni ab isnavańni zakulisnych damovaŭ miž administracyjami Polščy i Biełarusi ab narmalizacyi adnosinaŭ uzamien za spynieńnie padtrymki demakratyčnaj apazycyi ŭ Biełarusi.
Ambasadar Biełarusi ŭ Polščy Pavał Łatuška viartajecca na radzimu. Misija skončyłasia. Na zakančeńnie pasoł chacieŭ zrabić «dembielski akord» — adnym macham vyrašyć prablemu raskołataha SPB.Spryjalnyja ŭmovy (paciapleńnie adnosinaŭ z Zachadam) i prychilnaść palitykaŭ ŭradavaj Polskaj sialanskaj partyi zrabili svaju spravu. Udałosia prałabiravać u polskim MZS svaju prapanovu ŭrehulavańnia. Ale chapiła tolki ŭzhadvańnia ŭ ŚMI, i ŭsie ŭdzielniki nibyta hatovaj uhody pačali hromka tłumačycca i kazać, što ich nie tak zrazumieli.
Karaciej, Akieła pramachnuŭsia.
