Biełaruś i Kitaj padpisali pahadnieńnie pa realizacyi druhoha etapu prajekta pa budaŭnictvie sacyjalnaha žylla. Adpaviedny dakumient apublikavany na Nacyjanalnym pravavym partale.
Jak vynikaje z pahadnieńnia, usiaho budzie pabudavana 1854 kvatery sacyjalnaha žylla ŭ 22 damach šaści abłaściej i Minsku. Kitajski bok biare na siabie vydatki pa budaŭnictvie, daručaje kirujučaj prajektam kampanii ažyćciaŭlać źniešni nahlad i kiravańnie finansavańniem.
Vydatki na realizacyju prajekta składuć 349,09 młn kitajskich juaniaŭ (51,2 młn dalaraŭ). U Bresckaj vobłaści budzie vydatkavana 32,51 juaniaŭ (4,7 młn dalaraŭ), Viciebskaj - 55,53 juaniaŭ (8,1 młn dalaraŭ), Homielskaj - 54,73 juaniaŭ (8 młn dalaraŭ), Hrodzienskaj - 47, 51 młn juaniaŭ (6,9 młn dalaraŭ), Minskaj - 81,04 juaniaŭ (11,8 młn dalaraŭ), Mahiloŭskaj - 61,77 juaniaŭ (9 młn dalaraŭ), vydatki pa horadzie Minsku składuć 16 młn juaniaŭ (2,3 młn dalaraŭ). Praduhledžany taksama vydatki kampanii pa kiravańni prajektam ad kitajskaha boku.
«Finansavańnie vydzialajecca sa srodkaŭ technika-ekanamičnaj dapamohi, praduhledžanych Pahadnieńniem pamiž Uradam Kitajskaj Narodnaj Respubliki i Uradam Respubliki Biełarusi ab technika-ekanamičnaj dapamozie ad 29 vieraśnia 2016 hoda, i srodkaŭ technika-ekanamičnaj dapamohi ŭ 2017 hodzie», - havorycca ŭ dakumiencie.
Budaŭnictva budzie ažyćciaŭlać pradpryjemstva, jakoje Biełaruś abiare «z rekamiendavanych kitajskim bokam kitajskich pradpryjemstvaŭ».
Start prajektu byŭ dadzieny ŭ 2016 hodzie. Na pieršym etapie było zapłanavana pabudavać 16 sacyjalnych damoŭ u Breście, Pinsku, Viciebsku, Oršy, Homieli, Buda-Kašalovie, pasiołku Jubilejnym, Mazyry, Śvietłahorsku, Hrodnie, Mahilovie, Babrujsku i Asipovičach.
Pieršy namieśnik ministra architektury i budaŭnictva Alaksandr Kručanaŭ nazvaŭ hety prajekt «padarunkam biełaruskamu narodu».
Toje žyllo nie vystaŭlajecca na prodaž, a idzie ŭ kamunalnuju ŭłasnaść.
