Mašynu ź lidaram AHP Anatolem Labiedźkam, u jakoj taksama jechali Vital Rymašeŭski, Mikałaj Kazłoŭ i Volha Kavalkova, zatrymali siońnia ranicaj kala Ivacevičaŭ. Jany jechali ŭ Brest, na płanavany siońnia «Marš niedarmajedaŭ».
Pa słovach Labiedźki, im prapanujuć prajechać u RUUS dla razboru. Maŭlaŭ, kab źvieryć identyfikacyjny numar mašyny. «Jość padazreńnie, što heta nie ich numar, a mašyna znachodzicca ŭ vyšuku», — kaža supracoŭnik milicyi.
«Dastavim, pravierym i adpuścim», — kaža milicyjant.
Tym časam milicyja vyklikała padmohu. Pryjechali, pa słovach Labiedźki, jašče dva padpałkoŭniki ci pałkoŭniki.
«Naiŭnyja, — kaža Labiedźka, — jany dumajuć, što ludzi nie źbiarucca na mitynh».
Kazłoŭ kaža milicyjantam: «Sprava vyśviatleńnia numaru — sprava troch chvilin. Źviažyciesia pa racyi i ŭsio. Nie durycie mazhi».
10:26
Kavalkova i Rymašeŭski zastajucca z mašynaj. A Labiedźka sprabuje dabracca ŭ Brest paputkaj. Choć milicyja nastojvaje, kab jon zastaŭsia.
10:30
Mašyny nie spyniajucca. Labiedźka iranizuje, što pojdzie pieški ŭ Brest. Da horada 120 km.
10:40
Lidar AHP prajšoŭ užo kala kiłamietra. U ruce jon trymaje smartfon i raspaviadaje pra padarožža. «Pry takich strachach ułada doŭha nie praciahnie», — kaža jon.
Sp. Anatol idzie adzin. Kazłoŭ zastaŭsia z Rymašeŭskim i Kavalkovaj.
11:34
Kazłoŭ paviedamiŭ Radyjo Svaboda, što «Labiedźka złaviŭ spadarožnuju mašynu i ciapier jedzie pierada mnoj. Dobryja ludzi daviedalisia pra naš vypadak u internecie, vyjechali na trasu i zabrali taksama mianie. Ja taksama ruchajusia na mitynh. A milicyja tam praviaraje, što nibyta mašyna va ŭhonie, što pierabityja numary, ciahnuć čas. Vital Rymašeŭski i Volha Kavalkova zastalisia z mašynaj».
Labiedźka viarnuŭsia, padsieŭ u mašynu DAI. Dyskutuje z supracoŭnikami DAI i milicyi.
Ich źbirajucca vieźci ŭ RUUS.
11:40
Labiedźku i Rymašeŭskaha viazuć u pastarunak u Biarozie. Na akcyju ŭ Brest jany nie paśpiejuć.
