Tracina dziaciej va ŭzroście troch hadoŭ i amal usio darosłaje nasielnictva Biełarusi majuć karyjes zuboŭ, paviedamiŭ hałoŭny pazaštatny stamatołah Ministerstva achovy zdaroŭja Andrej Maćviejeŭ 8 lutaha na pres-kanfierencyi ŭ Minsku.
Thinkstock
Pa jaho słovach, danyja praviedzienaha niekalki hadoŭ tamu ŭ krainie abśledavańnia paćviardžajuć, što karyjoznyja paražeńni majuć 33% dziaciej va ŭzroście troch hadoŭ, 80% šaścihodak, 70% dvanaccacihodak i praktyčna 99% darosłych. Zachvorvańni pieryjadonta (chvaroby dziosien) majucca ŭ 100% darosłaha nasielnictva.
«U suviazi z vysokaj raspaŭsiudžanaściu karyjoznoj chvaroby i zachvorvańniaŭ pieryjadonta upieršyniu ŭ respublicy prahrama prafiłaktyki stamatałahičnych zachvorvańniaŭ uklučanaja ŭ dziaržprahramu «Zdaroŭje naroda i demahrafičnaja biaśpieka» na 2016-2020 hady i atrymlivaje dziaržpadtrymku, — raspavioŭ stamatołah. — Dziaržpadtrymka ŭklučaje ŭ siabie finansavańnie z respublikanskaha i miascovych biudžetaŭ nabyćcia ftorłakaŭ, siłantaŭ i indykataraŭ zubnoha nalotu».
Pa jaho słovach, kali pakryvać łakam, jaki ŭtrymlivaje ftor, zuby dzieciam ad adnaho hoda, to intensiŭnaść raźvićcia karyjesu praz try hady źnižajecca na 62%. Pry vykarystańni ŭ rańnim uzroście pasty z ftoram raźvićcio karyjesu źnižajecca ŭ čatyry razy.
«U 2017 hodzie ŭpieršyniu budzie pravodzicca abśledavańnie dziaciej va ŭzroście troch hadoŭ, što dazvolić nam pravieści bolš dakładnyja daśledavańni, dać rekamiendacyi dla raźvićcia stamatałohii, kaardynavać dziejańni našaj słužby», — raspavioŭ Maćviejeŭ.
Pa słovach zahadčycy kafiedry ahulnaj stamatałohii Biełaruskaj miedycynskaj akademii paśladypłomnaj adukacyi Natalli Judzinaj, u dziciačaha nasielnictva z ulikam prafiłaktyki zachvorvańnie karyjesam apošnija hady trochi źniziłasia — ciapier u 12-hadovych dziaciej u siarednim adznačajecca 2,2—2,4 karyjoznaha zuba (u 1998 hodzie hety pakazčyk składaŭ 3,8). Zatoje ŭ pažyłych ludziej, 23 z 32 zuboŭ albo majuć karyjes, albo zapłambavanyja, albo vydalenyja (tak zvany pakazčyk KPU).
«Siaredniaja kolkaść karyjoznych zuboŭ u darosłych ludziej 35-44 hadoŭ — 13, i, dumaju, mocna hety pakazčyk nie źmienicca. U Jeŭropie pakazčyk KPU składaje ad 11 da 19, — paviedamiła jana. — Pa zachvorvańniach pieryjadonta situacyja bolš sumnaja. A voś pa stanie hihijeny połaści rota jość niekatoryja palapšeńni».
U 2016 hodzie ŭ Biełarusi zarehistravana kala 16 młn naviedvańniaŭ stamatołaha (u 2010-m — kala 14 młn). Bolšaja častka zvarotaŭ była pa terapieŭtyčnym profili, zatym idzie artapiedyčny, chirurhičny profili, na čaćviortym miescy dziciačaja stamatałohija.
