«Śpiavać pa-biełarusku — nie vyjście. Na žal, heta ŭžo amal miortvaja mova, choć jaje i padtrymlivajuć štučna» — takija słovy śpievaka Vasila Sieliščava (Lermont) byli apublikavanyja na partale sputnik.by 13 studzienia.
Vasil Sieliščaŭ.
«Naša Niva» pieradrukavała skandalnuju zajavu ŭdzielnika adboru na «Jeŭrabačańnie», i internet vybuchnuŭ abureńniem.
«Eta chto?», «Pokazał siebia ohraničiennym h*nom…», «Eto vy, oba, miortvyje, a nie naša Mova. Očieriednoj «šiedievr» «spojut» — samyja załajkanyja kamientary na nn.by.
Jak vyjaviłasia, nieŭzabavie intervju, jakoje rabiŭ karespandent «Sputnika» Jaŭhien Kazarcaŭ, było adredahavanaje. Źnik tolki adzin skaz, pra miortvuju movu. Na sajcie paznačana, što źmieny ŭnosilisia ŭviečary 15 studzienia. Zrazumieła, što nichto z čytačoŭ nie zaŭvažyŭ źmieny ŭ artykule praź dzień paśla publikacyi.
Lermont i jahony kaleha Julic vystupili ŭ finale adboru, dzie zaniali apošniaje miesca. Hurt nie atrymaŭ nivodnaha bała ni ad hledačoŭ, ni ad žury. A Lermont paśpiašaŭsia adračysia prypisanych jamu źnievažalnych słovaŭ.
«Vy apublikavali infarmacyju, jakaja nie adpaviadaje rečaisnaści. Havorka pra frazu «biełaruskaja mova — miortvaja». Vy ŭziali jaje z partała sputnik.by, jaki prypisaŭ nam toje, čaho my nie kazali. I paźniej prybraŭ heta vykazvańnie», — napisaŭ Vasil Sieliščaŭ u «Art-Siadzibu».
Jon zapeŭniŭ, što lubić biełaruskuju movu i ličyć jaje adnoj z samych mieładyčnych. «U mianie ŭ samoha jość pieśnia «Nikoli», jakuju my zrabili pry padtrymcy partała tuzin.by i Siarhieja Budkina ŭ 2012 hodzie», — patłumčyŭ jon.
«Sputnik» — ahienctva navinaŭ, zasnavanaje padkantrolnym uradu Rasii ahienctvam «Rośsija siehodnia». Hienieralny dyrektar — prapahandyst Dźmitryj Kisialoŭ.
Dźmitryj Kisialoŭ — kiraŭnik sietki «Sputnikaŭ». Fota Iryny Arachoŭskaj.
Słohan «Sputnika» — «Raspaviadajem niedamoŭlenaje» («Hovorim to, o čiem druhije mołčat»).
P.S. Paśla publikacyi «Naša Niva» atrymała ad «Sputnika» aŭdyjofajł z zapisam słoŭ śpievaka, dzie jon sapraŭdy nazyvaje biełaruskuju movu «pamierłaj, na žal». «Jana padtrymlivajecca štučna», — dadaje jon i razvažaje pra niemahčymaść jaje adradzić, bo «niama takich resursaŭ, i navošta».
«Z sajta hetaja replika była źniataja pa jaho [śpievaka] prośbie. Ale, jak vy možacie pierakanacca, vymaŭlena heta sapraŭdy było», — napisaŭ nam karespandent «Sputnika» Jaŭhien Kazarcaŭ.
