Hety sajt mieścicca ŭ Rasii, ale maje ŭ naźvie prymietnik «biełaruski» i raźličany na biełaruskuju aŭdytoryju.
Sajt drukuje materyjały ŭ padtrymku niepryznanych respublik «ŁNR-DNR» i inšyja artykuły prarasijskaha źmiestu.
Niadaŭna hety sajt nazvaŭ biełaruskich analitykaŭ Sivickaha i Caryka rusafobami, jakim miesca ŭ turmie.
Ukrainskija chakiery ŭzłamali paštovuju skryniu belvpo.com@yandex.ru i praanalizavali elektronnyja listy.
Chakiery śćviardžajuć, što sajt kiravaŭsia biełaruskim aficeram u adstaŭcy Iharam Siniakovym i vykładčykam Biełaruskaha dziaržaŭnaha ŭniviersiteta infarmatyki i radyjoelektroniki (BDUIR) Siarhiejem Hiejsteram.
Na apošniaha, maŭlaŭ, byŭ aformleny mabilny numar, na jaki zarehistravany chostynh sajta i jahonyja staronki ŭ sacyjalnych sietkach.
«Naša Niva» źviazałasia sa zhadanym u materyjale vykładčykam BDUIR, doktaram techničnych navuk, navukovym supracoŭnikam NDI Uzbrojenych sił Biełarusi.
Siarhiej Hiejster.
«Ja vielmi lublu svaju biełaruskuju ziamlu, usio heta łaža, — skazaŭ nam Siarhiej Hiejster. — Ja nie chaču ciapier pahłyblacca ŭ hetaje śmiećcie, skažu tolki, što ŭ hetym ukidzie jość maleńkaja praŭda i vialikaja niapraŭda. Tak, na hetym sajcie ja drukavaŭsia — heta było ŭ 2011 hodzie, mnie tady prapanavali raźmiaścić niekalki artykułaŭ pra ŭzbrajeńni i pra tyja raspracoŭki, jakimi ja zajmajusia. Paśla hetaha ja pierastaŭ, hety sajt pierajšoŭ u inšyja ruki, ja ciapier im nie vałodaju».
Pavodle Siarhieja, choć uzhadany ŭ materylaje «Infarmnapałma» telefon i zarehistravany na jaho, ale jon im nie karystajecca — ciapierašni karystalnik numara, darečy, adklučyŭ na im hałasavyja vykliki.
U razmovie, darečy, my zhadali i niadaŭna aryštavanaha vykładčyka BDUIR Juryja Paŭłaŭca.
«Ja viedaju tolki toje, što svaju radzimu treba abaraniać. Ludzi, što tut žyvuć, — jany mnie rodnyja, tut ziemli pradzieda majho, žyvuć i žyli maje baćki. Patryjatyzm, jaki nie pradajecca. Ja padtrymlivaju tych, chto zmahajecca za hałosnaść, ale nie padtrymlivaju tych, chto joj złoŭžyvaje, ja lublu Biełaruś», — skazaŭ «Našaj Nivie» Hiejster.
