Spačatku, u 1991 h., tam było tolki 5 supracoŭnikaŭ, a naviny rassyłalisia padpisantam uručnuju faksam niekalki razoŭ na dzień. Pieršuju damovu na pastaŭku infarmacyi zaklučyli z hazietaj «Źviazda».
Na momant, kali stvaraŭsia BiełaPAN, aŭtaru prajekta Alesiu Lipaju było stolki ž, kolki siońnia kampanii — 25 hadoŭ.
Zasnavalnik BiełaPAN Aleś Lipaj
Pres-słužba HA «Biełaruskaja asacyjacyja žurnalistaŭ» pacikaviłasia ŭ Alesia, jak źmianilisia za hety čas aŭtar, jaho «dzicia», i chto jość honaram redakcyi.
— Infarmacyjnaja kampanija, na ščaście, adbyłasia. Stała surjoznaj źjavaj miedyjnaha, žurnalisckaha žyćcia ŭ Biełarusi. Hetyja 25 hadoŭ byli niedaremnymi. A ja staŭ macniejšym na BiełaPAN za hety čas. Našy najlepšyja prajekty heta — internet-hazieta Naviny.by, redakcyja miedyja-navin. My pieršymi ŭ Biełarusi pačali ładzić anłajn kanfierencyi ź viadomymi asobami, pieršymi pačali rabić infahrafiku.
Našy žurnalisty staleli razam ź BiełaPANam, adbylisia razam ź im. I BiełaPAN adbyŭsia z hetymi ludźmi.
Heta — naš hałoŭny redaktar infarmacyjnaj ahiencyi BiełaPAN Iryna Leŭšyna, šef-redaktar internet-haziety Naviny.by Alaksandr Zajcaŭ, žurnalisty Alaksiej Areška, Alena Spasiuk, Viačasłaŭ Budkievič, Taćciana Karaviankova, Adarja Huštyn, Aleś Jaraševič. Alaksandr Kłaskoŭski adbyŭsia dziakujučy tamu, što jon Kłaskoŭski. Jon pryjšoŭ u BiełPAN jak vybitny žurnalist i redaktar, šmat hadoŭ pracuje ŭ nas i źjaŭlajecca našym honaram. Taksama heta i Juryj Uładzimiravič Vieltnier.
I ŭ internet-haziecie Naviny.by tradycyjna dobra čytajucca materyjały palityčnaha ahladalnika Alaksandra Kłaskoŭskaha, ekanamičnaha ahladalnika Dźmitryja Zajca. U nas stałaja i surjoznaja aŭdytoryja, tamu čytačy lubiać analityčnyja artykuły.
Aleś Lipaj kaža, što BiełaPANu nikoli nie było lohka: «Lohka nam nikoli nie było pracavać. Moža być, tolki na pačatku našaj dziejnaści da 1994 hoda. Niaprostyja ŭmovy isnavańnia niezaležnych miedyjaŭ ŭ Biełarusi nie dazvalajuć havaryć pra lohkuju pracu. Razam z tym u krainie adbyvajucca padziei, jakija źviartajuć na siabie ŭvahu navat bujnych mižnarodnych ŚMI, to hrech było b skardzicca, što pracavać u Biełarusi niecikava».
Kalektyŭ BiełaPAN, 2015 hod, fota Taćciany Karaviankovaj.
