Adzin z rabotnikaŭ handlovaha centra «Jeŭropa» Alaksandr raspavioŭ, jak zatrymaŭ napadnika ź siakieraj. 8 kastryčnika nieviadomyja napali ź bienzapiłoj i siakieraj na naviedvalnikaŭ centra. U vyniku niekalki čałaviek byli paranienyja, adna žančyna zahinuła.
Mužčyna raspavioŭ što ŭbačyŭ paniku, kali vyjšaŭ z tualeta. Pavodle jaho słoŭ, pa HC bieh čałaviek ź siakieraj i hazavym bałončykam. Chłopcy ź inšych kram zamachvalisia na jaho kresłami i kidali śmiećcievyja viodry, sprabujučy spynić.
— Ja zaŭvažyŭ, što jon pa leśvicy źbirajecca biehčy da vychadu, ja chutčej spuściŭsia pa eskałatary i pierachapiŭ jaho. Udaryŭ paru razoŭ i skruciŭ. Padbiehli inšyja chłopcy i dapamahli. Praz paru chvilin padaśpieli supracoŭniki milicyi i adviali napadnika.
Alaksandr raspavioŭ, što mužčyna słavianskaj źniešnaści. Jon nie akazvaŭ supracivu.
Nahadajem, što ŭčora ŭ handlovym centry «Jeŭropa» ŭ centry Minska 18-hadovy chłopiec ź bienzapiłoj i siakieraj napaŭ na naviedvalnikaŭ. Adna žančyna była paranienaja, jašče adna zahinuła.
Małady čałaviek 1998 hoda naradžeńnia prynios siakieru ŭ futurale ad muzyčnaha instrumienta, a ŭ ruce trymaŭ bienzapiłu.
Z zaviedzienaj bienzapiłoj jon napaŭ na dźviuch rabotnic HC kala «Tera picy». Mierkavana, adnu žančynu chłopiec paraniŭ, jana ŭ balnicy. Paśla čaho napadnik nakinuŭsia na inšuju žančynu. Joj vyratavacca nie ŭdałosia, jana zahinuła.
ANT sa spasyłkaj na milicyju ŭ «Navinach» paviedamiła, što heta była supracoŭnica kramy. Jana adyšłasia z pracoŭnaha miesca kupić kałhotki. Paźniej SK paviedamiŭ, što jana 1973 h.n.
Pa fakcie napadu raspačata kryminalnaja sprava, paviedamiŭ siońnia žurnalistam u Minsku pieršy namieśnik staršyni Śledčaha kamiteta Alaksiej Vołkaŭ.
«Pa hetym fakcie zaviedziena kryminalnaja sprava. Jana pryniata da vytvorčaści śledčymi centralnaha aparata Śledčaha kamiteta. Pravodziacca śledčyja dziejańni», — painfarmavaŭ BiełTA Vołkaŭ.
Napadnik byŭ adzin. A čutki pra toje, što napadnikaŭ było niekalki, źviazanyja z tym, što čałavieka bačyli spačatku ź bienzapiłoj, potym ź siakieraj, rastłumačyli ŭ Śledčym kamitecie.
Milicyja ź miesca zdareńnia paviedamiła padrabiaznaści trahiedyi.
«Małady čałaviek 1998 hoda naradžeńnia ŭ 17:28 pryjšoŭ u HC «Jeŭropa». Jon byŭ dobra apranuty, u jaho byŭ čachoł dla hitary, u jakoj była siakiera, a pry sabie bienzapiła. Jon zaviedzienaj bienzapiłoj pryčyniŭ cialesnyja paškodžańni žančynie, jana pamierła. Potym rasšpiliŭ čachoł, dastaŭ siakieru i pačaŭ pahražać pakupnikam. Hramadzian było niašmat, try-čatyry čałavieki.
U 17:34 pastupiŭ pieršy zvanok u dziažurnuju častku HUUS,
u 17:35 prybyŭ pieršy narad…
U 17:38 napadnik byŭ zatrymany. Jon znachodzicca ŭ dziažurnaj častcy RUUS».
Zajava milicyi (videa)
Cieła zahinułaj lažyć na pieršym paviersie HC «Jeŭropa», kala ŭvachodu ŭ kaviarniu. Jano bačnaje z vulicy tolki z adnaho rakursu — na aśvietlenym łapiku padłohi miž stałami.
Nasupierak čutkam pieršych chvilin, paviedamlaje karespandent NN, hałava achviary nie adrezanaja. Na padłozie bačnaja kroŭ. Terytoryju vakoł cieła vyvučajuć śledčyja — niekalki čałaviek u cyvilnym.
Śledčy kamitet pačaŭ kryminalnuju spravu pa č.2 art.139 KK «Zabojstva».
