Akurat na svajo 15-hodździe hurt Pomidor/off prezentuje na Tuzin.fm pieršy aficyjny klip. Videa ŭ styli suprematyzmu na pieśniu «Dym» zrabiŭ mastak-animatar Siarhiej Kastrycki.
Inicyjatyvu zrabić videaŭvasableńnie pieśni «Dym» vyjaviŭ sam mastak. «My nikoli dahetul nie zdymali klipy na svaje pieśni, a kali i niešta dumali, to nie vychodziła sa zdymačnaj hrupaj, ci toje natura sychodziła, ci banalna nie było hrošaj. Niejak da mianie źviarnuŭsia daŭni siabar Siarhiej Kastrycki, jaki zachacieŭ namalavać klip mienavita na «Dym». Jon atrymaŭ poŭnuju svabodu, my ŭ praces zusim nie ŭmiešvalisia. I toje, što atrymałasia pa vyniku nam usim niejmavierna padabajecca», – skazaŭ z nahody premjery na Tuzin.fm Alaksandar Pamidoraŭ.
Pieśnia «Dym» vyjšła na albomie «Patas/Pops/Prapahanda» (2011). Pamidoravu chaciełasia, kab u joj prahučała soła ŭ styli Alaksandra Urakava, jaki pamior u 2003 hodzie, bo jahonaj pamiaci i pamiaci ŭsich biełaruskich muzykaŭ, jakija pajšli ŭ inšy śviet, i byŭ pieršapačatkova pryśviečany tvor. Tamu na zapis zaprasili siabru i vučnia hitarysta Gods Tower Źmitra Łazarenku. Pa vyniku jana była pryznanaja «Pieśniaj hodu» na apošniaj u historyi «Rok-Karanacyi» (2011), a paźniej uvajšła ŭ lik «100 najvialikšych piesień» uapytańni 90 ekspertaŭ, jakoje ładziŭ Tuzin.fm. Sa strunnym kvartetam i trochi inšym tekstam hetaja pieśnia taksama prahučyć u miežach prajektu «Apošni zołak».
«Pieśnia sama pa sabie vielmi cikavaja i vielmi słušnaja ŭ enerhietyčnym planie, z pasyłam. Pamidoraŭ jaje pisaŭ zadoŭha da Majdana, ale ŭsio, što my čujem u joj, jak byccam by pra ŭsie Płoščy, na jakich adbyvajucca revalucyi varjactva. Pieśnia nastolki kankretnaja, što navat adčuvaješ, jak pachnuć pakryški, što harać. Sumna i nieaptymistyčna, ale hetaja pieśnia pra nas», – raspaviadaje režyser klipa Siarhiej Kastrycki. Jon kaža, što pastaviŭ pierad saboju zadaču – stylizavać animacyjny rolik u składanym i nia ŭsimi lubimym styli. Zazirnuć u systemu žyćcia suprematyčnaha śvietu mastaku padkazała sama pieśnia, tamu i namalavana ŭsio ŭ styli tradycyjnaj viciebskaj škoły z pryvitam Maleviču, Penu i Kandzinskamu. Dla Siarhieja heta ŭžo druhi aŭtarski klip – raniej jon šykoŭna ŭvasobiŭ pieśniu «Na Kalady»Źmitra Vajciuškieviča.
Vychad klipa na «Dym» prypaŭ jakraz na 15-hodździe hurta Pomidor/off. Mienavita ŭ lipieni 2011 hodu kamanda Alaksandra Pamidorava dali svoj pieršy kancert.
Pomidor/off – Dym (režyser Siarhiej Kastrycki). Źmiaščajecca sa zhody vykanaŭcy.
