Čarhovaje pasiadžeńnie Vyšejšaha dziaržsavieta (VDS) Sajuznaj dziaržavy Biełarusi i Rasii projdzie ŭ Minsku 25 lutaha.
Pravieści sajuzny samit u Minsku prapanavaŭ Alaksandr Łukašenka ŭ časie sustrečy ź dziaržsakratarom Sajuznaj dziaržavy (SD) Ryhoram Rapotam 18 studzienia. Łukašenka tady nahadaŭ pra svaju damoŭlenaść z prezidentam RF Uładzimiram Pucinym pravieści pasiadžeńnie VDS u pieršym kvartale 2016 hoda i vykazaŭ hatoŭnaść padklučycca da prapracoŭki paradku dnia. Jon taksama adznačyŭ, što treba budzie aktyŭna papracavać, kab ažyvić pracu ŭ Sajuznaj dziaržavie.
Rapota, sa svajho boku, paviedamiŭ, što ŭ paradak dnia samitu, što maje adbycca, płanujecca ŭklučyć 12 pytańniaŭ, jakija tyčacca ŭsiaho śpiektra dziejnaści Sajuznaj dziaržavy. U ich liku — zaćviardžeńnie sajuznaha biudžetu na 2016 hod, abmierkavańnie vynikaŭ handlova-ekanamičnaha supracoŭnictva i realizacyi prahramy pryjarytetnych kirunkaŭ raźvićcia SD. Akramia taho, adznačyŭ Rapota, płanujecca «zrabić bolšy akcent u našym uzajemadziejańni ŭ navukova-techničnaj śfiery».
Apošniaje pasiadžeńnie VDS adbyłosia ŭ Maskvie 3 sakavika 2015 hoda. Pa vynikach pasiadžeńnia byli padpisany čatyry pahadnieńni: ab paradku ŭzajemnaha vykanańnia sudovych pastanoŭ pa spravach ab spahnańni alimientaŭ; ab uzajemnym pryznańni i paradku vykanańnia rašeńniaŭ ab admovie va ŭjeździe na terytoryju dziaržaŭ — udzielnic Sajuznaj dziaržavy; ab paradku abmienu źviestkami ab hramadzianach Biełarusi i Rasii, u dačynieńni da jakich dziejničajuć abmiežavańni na vyjezd; pratakoł ab uniasieńni źmianieńniaŭ u pahadnieńnie ab zabieśpiačeńni roŭnych pravoŭ hramadzian Biełarusi i Rasii na svabodu pieramiaščeńnia, vybar miesca znachodžańnia i žycharstva na terytoryjach dziaržaŭ — udzielnic Sajuznaj dziaržavy ad 24 studzienia 2006 hoda.
