39-hadovy žychar Polščy zahinuŭ, pravaliŭšysia ŭ sklep na starych niamieckich mohiłkach u polskim horadzie Śviabodzice.
Mahčyma, skarbašukalnik chacieŭ znajści ŭvachod u tunel, dzie pa čutkach schavany «załaty ciahnik» nacystaŭ.
Pra heta ŭ sieradu, 9 vieraśnia, paviedamiła polskaje Radio Wroclaw. Pavodle palicyi mužčyna zahinuŭ, zvaliŭšysia z vyšyni čatyroch mietraŭ.
Adzin z tunelaŭ niepadalok ad Vałbžycha. Fota: Reuters
Rozhałas z nahody imaviernaj znachodki «załatoha ciahnika», jaki pačaŭsia ŭ Polščy ŭ kancy žniŭnia 2015 hoda, nie spyniajecca. Gazeta Wroclawska paviedamiła ab imaviernym znachodžańni ŭ rajonie horada Vałbžych jašče adnaho padziemnaha tunelu, daŭžynia jakoha moža składać da dvuch kiłamietraŭ. Aficyjnyja ŭłady pakul nie paćviardžajuć hetuju infarmacyju.
U kancy žniŭnia dva žychary horada Vałbžych zajavili, što im udałosia znajści ŭ staroj šachcie niamiecki bronieciahnik časoŭ Druhoj suśvietnaj vajny, u jakim zachoŭvajecca nibyta 300 ton zołata. Jany byli hatovyja pakazać, dzie znachodzicca «załaty ciahnik» pry ŭmovie vypłaty im uznaharodžańnia ŭ pamiery 10 pracentaŭ ad koštu znachodki.
