Kampanija Apple 9 vieraśnia pakazała śvietu navinki — iPhone 6s i iPhone 6s Plus, iPad Pro i abnoŭlenuju prystaŭku Apple TV. Prezientacyja novych praduktaŭ Apple prajšła ŭ San-Francyska ŭ spartyŭnym kompleksie Bill Graham Civic Auditorium u prysutnaści 7000 hledačoŭ.
Prezientavaŭ novyja pradukty hienieralny dyrektar kampanii Cim Kuk.
Akcyi Apple upali paśla kanfierencyi na 1,9%.
«Apple stanovicca ŭsio ciažej i ciažej kankuravać z samim saboj», — cytuje «Rejter» analityka TECHnalysis Research Boba O'Doneła.
U pryvatnaści iPad Pro byŭ nazvany «samaj vialikaj navinoj sa śvietu iPad z vypusku pieršaha iPad».
Hetym praduktam staŭ novy iPad Pro. Dyjahanal ekrana płanšeta składzie 12,9 cali.
Novy płanšet možna budzie dałučyć da ŭłasnaj kłavijatury, pa sutnaści, pieratvaryŭšy ŭ noŭtbuk. Ciapier na rynku takaja funkcyja ŭžo jość, naprykład, u płanšeta Microsoft Surface.
Akumulatar novaha płanšeta dazvolić pracavać na praciahu 10 hadzin. U madeli vykarystoŭvajecca novy pracesar Apple A9X, jaki, pa słovach Fiła Šylera, jaki pravodziŭ prezientacyju, pa pradukcyjnaści nie sastupaje 80% noŭtbukam apošniaha pakaleńnia.
Taksama płanšet budzie abstalavany datčykam cisku.
Jak i čakałasia, novy płanšet abstalavany styłusam. Pa słovach Šylera, dyzajn płastykavaha «ałoŭka», Apple Pencil, raspracavaŭ viadomy dyzajnier Džoni Ajv.
Abvieščanaja cana 32-hihabajtnaha iPad Pro — 799 dalaraŭ ZŠA, 128-hihabajtnaja viersija abyjdziecca pakupniku ŭ 949 dalaraŭ (bieź simkarty), a 128-hihabajtny ź simkartaj — 1079 dalaraŭ. Abvieščanaja cana styłusa — 99 dalaraŭ ZŠA, a mahnitnaj kłavijatury — 169 dalaraŭ ZŠA.
Taksama Apple vypuściła novyja viersii abiedźviuch svaich apošnich madelaŭ, dadaŭšy litaru S da numara - iPhone 6S i iPhone 6S Plus.
Pryłady atrymali toj ža dyzajn, što i ich papiaredniki, adnak, pa słovach kiraŭnika karparacyi Cima Kuka, u smartfonie źmianiłasia «litaralna ŭsio». Adzinaje vizualnaje adroźnieńnie ad papiaredniaj viersii — źjaŭleńnie novaha koleru pryłady — «ružovaje zołata».
U pryvatnaści, devajs abstalavany technałohijaj 3D Touch — druhoje pakaleńnie Force Touch, jakaja dazvalaje vyznačać try stupieni siły nacisku.
Takim čynam, novy iPhone budzie zdolny adroźnivać mocny nacisk ad słaboha i, adpaviedna, vykonvać standartnaje dziejańnie abo adlustravańnie mieniu.
iPhone taksama atrymaŭ abnoŭlenuju kamieru — 12 miehapiksielaŭ zamiest 8-mi na papiaredniaj madeli. Jana budzie zdymać videa z 4K — 4096 na 2160 piksielaŭ.
Novyja madeli iPhone pastupiać u prodaž 25 vieraśnia. Košt pry kupli z kantraktam ŭ ZŠA składzie ad 199 da 399 dalaraŭ za madel 6S, madel 6S Plus abyjdziecca ŭ sumu ad 299 da 499 dalaraŭ.
