Centralny navukova-daśledčy instytut ekanomiki, infarmatyki i sistem kiravańnia, jaki byŭ pryciahnuty Ministerstvam unutranych spraŭ Rasii dla baraćby z ananimnaściu ŭ internecie, hatovy adrakčysia ŭskładzienych abaviazkaŭ i zapłacić 10 młn rub. Ab hetym piša rasijskaja hazieta «Kommiersant».
CNDI EISK i MUS Rasii zaklučyli kantrakt, zhodna ź jakim arhanizacyja pavinna była pravieści pracu pa identyfikacyi karystalnikaŭ suśvietna viadomaha ananimajziera Tor. U mai hetaha hoda instytut pravioŭ tendar pa pryciahnieńni jurydyčnaj firmy dla zaklučeńnia kantraktu na 10 młn rub. — i dla «padrychtoŭki pravavoj pazicyi datyčna paradku skasavańnia».
Zhodna ź infarmacyjaj adnaho z kantraktaŭ, instytut abaviazali vykanać navukova-daśledčyja raboty pad šyfram «TOR», a taksama dośledna-kanstruktarskuju pracu pad šyfram «Chamieleon-2», jakaja mierkavała «stvareńnie aparatna-prahramnaha kompleksu pa praviadzieńni sakretnaha i schavanaha addalenaha dostupu da apieratyŭna značnaj infarmacyi na metavaj elektronna-vyličalnaj mašynie».
Jak zaŭždy z takimi paviedamleńniami, ciažka skazać, ci sapraŭdy Rasii nie ŭdajecca złamać ananimajzier, ci hety źliŭ infarmacyi — tolki dymavaja zasłona.
Tor (skaročanaje ad anhlijskaha The Onion Router) — svabodnaje i adkrytaje prahramnaje zabieśpiačeńnie dla realizacyi druhoha pakaleńnia tak zvanaj cybulnaj maršrutyzacyi. Heta sistema proksi-siervieraŭ, jakaja dazvalaje ŭstaloŭvać ananimnaje sietkavaje złučeńnie, abaronienaje ad prasłuchoŭvańnia. Razhladajecca jak ananimnaja sietka virtualnych tunelaŭ, jakaja nadaje pieradaču dadzienych u zašyfravanym vyhladzie. Napisana pieravažna na movach prahramavańnia C, C++ i Python.
Jak paviedamlaje Vikipiedyja, sistema Tor była stvorana ŭ «Centry vysokapradukcyjnych vyličalnych sistem» Daśledčaj łabaratoryi Vajenna-marskich sił ZŠA ŭ ramkach prajekta Free Haven supolna z DARPA pa fiederalnaj zamovie. U 2002 hodzie hetuju raspracoŭku vyrašyli rassakrecić, a zychodnyja teksty byli pieradadzienyja niezaležnym raspracoŭnikam, jakija stvaryli klijent-sierviernaje prykładańnie i apublikavali jaho pad volnaj licenzijaj, kab usie achvotnyja mahli pravieści pravierku na adsutnaść pamyłak i zakładak.
Ab padtrymcy prajekta abviaściła pravaabarončaja arhanizacyja Electronic Frontier Foundation, jakaja pačała aktyŭna prapahandavać novuju sistemu i prykładać značnyja namahańni dla maksimalnaha pašyreńnia sietki. Istotnuju finansavuju dapamohu Tor akazvajuć Ministerstva abarony i Dziaržaŭny departamient ZŠA, a taksama Nacyjanalny navukovy fond. Pa stanie na kaniec 2014 Tor mieŭ bolš za 6500 vuzłoŭ sietki, jakija byli raskidanyja pa ŭsich kantynientach Ziamli, a kolkaść udzielnikaŭ sietki, uklučajučy botaŭ, pieravyšaje 2,5 miljona. Pavodle źviestak Tor Metrics, u lipieni 2014 Rasija ŭvajšła ŭ trojku krain, najbolš aktyŭna vykarystoŭvajuć Tor.
