Sudom Kastryčnickaha rajona Mahilova pastanoŭleny pryhavor u dačynieńni da 30-hadovaj miascovaj žycharki, jakaja maje na ŭtrymańni troch małaletnich dziaciej. Da zatrymańnia žančyna znachodziłasia ŭ adpačynku pa dohladzie dzicia, raniej nie była sudzimaja. Jana abvinavačvałasia ŭ zamachu na naŭmysnaje supraćpraŭnaje pazbaŭleńnie žyćcia inšaha čałavieka (zabojstva) (č. 1 art. 14 i č. 1 art. 139 KK).
Jak paviedamiŭ BiełaPAN načalnik adździeła prakuratury Mahiloŭskaj vobłaści Siarhiej Minaŭ, u studzieni 2015 hoda abvinavačvanaja, znachodziačysia ŭ kvatery, dzie jana pražyvała sumiesna sa svaim bratam, paśla sumiesnaha raśpivańnia ź im śpirtnych napojaŭ padčas svarki naŭmysna, z metaj pazbaŭleńnia žyćcia, naniesła bratu dva ŭdary nažom u śpinu i šyju, pryčyniŭšy paciarpiełamu ciažkija cialesnyja paškodžańni.
Brat zdoleŭ vychapić u jaje nož i vykinuŭ jaho ŭ adkrytyja dźviery na vulicu. Paśla hetaha jamu była svoječasova akazanaja kvalifikavanaja miedycynskaja dapamoha.
Padčas papiaredniaha śledstva i ŭ sudzie žančyna vinu pryznała častkova, ukazaŭšy, što zabivać brata nie chacieła, a naniesła jamu dva ŭdary nažom z-za svarki, bo ličyła, što jon skraŭ u jaje hrošy.
Za ŭčynienaje złačynstva sud pryznačyŭ žančynie pakarańnie ŭ vyhladzie siami hadoŭ pazbaŭleńnia voli z adbyvańniem u papraŭčaj kałonii ahulnaha režymu.
Z pryhavoram abvinavačvanaja nie pahadziłasia, abskardziŭšy jaho ŭ Mahiloŭski abłasny sud. Pastanovaj kalehii pa kryminalnych spravach Mahiloŭskaha abłasnoha suda pryhavor pakinuty bieź źmianieńnia, skarha abvinavačvanaj — biez zadavalnieńnia.
Pryhavor suda Kastryčnickaha rajona Mahilova nabyŭ moc.
