Homielski abłasny sud 18 žniŭnia pačaŭ razhlad kryminalnaj spravy ŭ dačynieńni da žycharoŭ Homiela — žančyny 1983 hoda naradžeńnia i mužčyny 1979 hoda naradžeńnia. Jany abvinavačvajucca ŭ zabojstvie (art. 139 KK) i pakidańni ŭ niebiaśpiecy (art. 159 KK) svaich małaletnich dziaciej.
U studzieni 2015 hoda ŭ padjeździe doma № 46 pa vulicy Mazurava ŭ abłasnym centry byŭ znojdzieny novanarodžany chłopčyk.
Milicyja zaniałasia pošukam jaho baćkoŭ, jakija pryviali da strašnaj znachodki: u zamknionaj kvatery mužčyny było znojdziena mumifikavanaje cieła trochmiesiačnaj dziaŭčynki. Achviara pralažała ŭ kvatery vosiem miesiacaŭ. Jaje kinuli ŭ mai 2014 hoda, a cieła znajšli ŭ studzieni 2015-ha. Uvieś hety čas bijałahičnyja baćki Śniažany, jakija pakinuli dziaŭčynku pamirać, badzialisia.
U śniežni 2014 hoda žančyna naradziła chłopčyka i padkinuła niemaŭla ŭ padjezd žyłoha doma. Usiaho ŭ žančyny było piaciora dziaciej, traich starejšych (2002, 2006 i 2007 hoda naradžeńnia) vychoŭvaje babula.
Pavodle abvinavačańnia, vystaŭlenaha na papiarednim śledstvie, baćki naŭmysna pakinuli dačku biez nahladu, bo byli ŭpeŭnienyja, što biez karmleńnia i dohladu jana pamre. Zamknuŭšy ŭvachodnyja dźviery na zamok, abvinavačvanyja ŭ kvatery bolš nie ź`iaŭlalisia. Pryznana, što abvinavačvanyja znachodziacca ŭ svaim rozumie. Pryčyna śmierci trochmiesiačnaj Śniažany nie ŭstanoŭlena ŭ suviazi z mumifikacyjaj i častkovym skieletavańniem, adsutnaściu ŭnutranych orhanaŭ.
U sudzie 18 žniŭnia była dapytana abvinavačvanaja, 32-hadovaja Vijaleta.
Jana častkova pryznała vinu, rastłumačyŭšy, što nie chacieła śmierci dački, a syšła z kvatery i nie viartałasia, tamu što była p`ianaja i nie razumieła, što robić. Žančyna, pavodle jaje słoŭ, spadziavałasia, što dzicia budzie płakać i jaho znojduć. Pakidajučy ŭ studzieni 2015 hoda ŭ padjeździe doma novanarodžanaha chłopčyka, abvinavačvanaja, pavodle jaje słoŭ, taksama spadziavałasia, što niemaŭla chto-niebudź znojdzie.
Žančyna na śledstvie i sudzie nieadnarazova mianiała pakazańni. Pry zatrymańni jana śćviardžała, što Śniažanu zadušyŭ bijałahičny baćka padčas svarki. Svarylisia sužycieli z-za hrošaj: Vijaleta raskazała siabru, što jana sa svajoj maci atrymała dapamohu na Śniažanu ŭ sumie 23 młn. rubloŭ. Sužyciel źniervavaŭsia, što hetyja hrošy nie dastalisia jamu, a jon chacieŭ kupić mabilny telefon, i pačaŭ skandalić.
Pavodle adnych pakazańniaŭ abvinavačvanaj, Maksim razzłavaŭsia, što jamu nie dastalisia hrošy, i zadušyŭ dziaŭčynku sa słovami «Ni sabie, ni ludziam», a zatym jany zamknuli kvateru i pajšli badziacca. Na vočnaj staŭcy žančyna źmianiła pakazańni i zajaviła, što sužyciel nie zabivaŭ dzicia, jany ŭdvaich napilisia i pajšli hulać. Potym u kvateru nie viartalisia, tamu što Vijaleta «bajałasia».
Na sudzie žančyna raskazała, što na pieršym dopycie ŭ studzieni 2015 hoda ahavaryła sužyciela, bo opierupaŭnavažany skazaŭ joj, byccam Maksim pryznaŭsia, što zadušyŭ dziaŭčynku. Pavodle słoŭ abvinavačvanaj, opierupaŭnavažany ŭdaryŭ jaje pa hałavie knihaj dva razy, tamu jana i dała takija pakazańni.
Žančyna daje supiarečlivyja pakazańni pra akaličnaści i detali ŭčynieńnia złačynstva. Taksama na papiarednim śledstvie jana nie mahła rastłumačyć pryčyny i matyvy svaich učynkaŭ, kazała, što «čort spakusiŭ».
Abvinavačvany vinu pryznaje častkova, śćviardžaje, što jon ź siabroŭkaj prosta pajšli z kvatery, kali Śniažana była jašče žyvaja i spała, i namieru pazbaŭlać jaje žyćcia nie było.
Mužčyna budzie dapytany ŭ sudovym pasiadžeńni 19 žniŭnia.
Chłopčyka, jakoha nieŭzabavie paśla rodaŭ žančyna ŭ studzieni kinuła ŭ padjeździe, užo ŭsynavili.
