Staršynia Centrvybarkama Lidzija Jarmošyna nie vyklučaje ŭ budučym pierachodu na hałasavańnie pa elektronnaj pošcie dla hramadzian Biełarusi, jakija pražyvajuć za miežami krainy.
Jak adznačyła Lidzija Jarmošyna, rost učastkaŭ dla hałasavańnia za miažoj śviedčyć ab tym, što kolkaść biełaruskich hramadzian, jakija pražyvajuć za miažoj, značna pavialičyłasia.
Pry hetym staršynia CVK źviarnuła ŭvahu, što ŭ Rasii i Polščy dla hałasavańnia na hetych prezidenckich vybarach utvorana adnolkavaja kolkaść učastkaŭ (pa čatyry). «Choć ja liču, što dla Rasii hetaha vidavočna niedastkova, pakolki hramadzianie Biełarusi, jakija pracujuć, naprykład, na Poŭnačy, u vybarach udzielničać, na žal, nie zmohuć. Jany mohuć, viadoma, pryjechać u Maskvu, ale ja sumniavajusia, što jany heta zrobiać, - zaŭvažyła jana. - Tamu mienavita dla takich vypadkaŭ treba niekali pierachodzić (i ja dumaju, što niekali heta adbudziecca) na hałasavańnie pa elektronnaj pošcie».
Pavodle słoŭ staršyni Centrvybarkama, pry hałasavańni pa elektronnaj pošcie važna, pa-pieršaje, identyfikavać vybarščyka, a pa-druhoje, zachavać tajnu jaho volevyjaŭleńnia.
«Ciapier aktyŭna ŭkaraniajecca elektronny podpis, tamu ja liču, što identyfikavać vybarščykaŭ budzie davoli prosta. Adzinaje, treba pradumać pytańnie tajemnaści hałasavańnia», — adznačyła Lidzija Jarmošyna.
Usiaho dla hetych prezidenckich vybaraŭ stvorana 6129 učastkaŭ dla hałasavańnia, ź jakich 49 — za miažoj. Zamiežnyja ŭčastki ŭtvorany pry dyppradstaŭnictvach u nastupnych haradach: Viena (Aŭstryja), Baku (Azierbajdžan), Jerevan (Armienija), Brusiel (Bielhija), Safija (Bałharyja), Łondan (Vialikabrytanija), Budapiešt (Vienhryja), Karakas (Vieniesueła), Bierlin i Miunchien (Hiermanija), Tel-Aviŭ (Izrail), Ńju-Deli (Indyja), Rym i Miłan (Italija), Astana (Kazachstan), Atava (Kanada), Piekin i Šanchaj (Kitaj), Havana (Kuba), Ryha i Daŭhaŭpiłs (Łatvija), Vilnius (Litva), Kišynioŭ (Małdova), Haaha (Niderłandy), Varšava, Hdańsk, Biełastok i Biała-Padlaska (Polšča), Abu-Dabi (AAE), Maskva, Sankt-Pieciarburh, Kalininhrad i Rastoŭ-na-Donie (Rasija), Białhrad (Sierbija), Bracisłava (Słavakija), Vašynhton i Ńju-Jork (ZŠA), Ankara i Stambuł (Turcyja), Taškient (Uźbiekistan), Kijeŭ (Ukraina), Paryž (Francyja), Chielsinki (Finlandyja), Praha (Čechija), Biern (Šviejcaryja), Kita (Ekvador), Talin (Estonija), Pretoryja (PAR), Tokia (Japonija).
