BiełTA
Dziaržava nie maje namieru pakul pradavać AAT «Minski zavod kołavych ciahačoŭ». Ab hetym zajaviŭ Alaksandr Łukašenka, naviedvajučy siońnia heta pradpryjemstva.
«Ja nie chacieŭ by pryvatyzavać (čytaj: addavać za biaspłatna) toje, što stvorana narodam», - skazaŭ kiraŭnik dziaržavy.
Alaksandr Łukašenka adznačyŭ, što apošnija hod-dva naviazvajuć ideju pryvatyzacyi i prodažu hetaha pradpryjemstva. «Majo staŭleńnie da pryvatyzacyi vy viedajecie. Nie my heta z vami stvarali, heta stvorana niekalkimi pakaleńniami, prynamsi, my treciaje pakaleńnie, jakoje tut pracuje, i nie nam z vami vyrašać u korani hetu prablemu.
Choć, kali paŭstanie pytańnie, - daviadziecca», - adznačyŭ biełaruski lidar.
«Što ŭ nas takaja situacyja patavaja, što ledź nie biaspłatna treba pradavać heta pradpryjemstva?» - dadaŭ jon.
Kiraŭnik dziaržavy nahadaŭ, što pa praviłach dla pryvatyzacyi pradpryjemstva pieršapačatkova treba zhoda pracoŭnaha kalektyvu. Paśla rašeńnie prymaje Minski harvykankam i ministr, potym urad, i paśla hetaha dakumienty traplajuć na stoł prezidenta, i jon kančatkova prymaje rašeńnie ab pryvatyzacyi taho ci inšaha pradpryjemstva.
Alaksandr Łukašenka raskazaŭ, što vielmi šmat było prapanoŭ. Pavodle jaho słoŭ, vielmi aktyŭna siabie ŭ hetym napramku pavodzić Rasijskaja Fiederacyja.
«Kali niešta i pradavać, to heta treba pradavać za vialikija hrošy. Ale nam časta havorać: my možam za miljard dołaraŭ taki zavod pabudavać, a vy ad nas patrabujecie dva miljardy. Ja kažu: pasprabujcie. Zavod možna pabudavać, ścieny niadoraha kaštujuć, abstalavańnie možna kupić, i kredyty daduć tyja, chto vyrablaje abstalavańnie. A voś ludziej navučyć pracavać na hetym abstalavańni ŭ hetych ścienach, stvaryć škołu dla taho, kab atrymlivać jakasny pradukt, - heta navat nie hady, a dziesiacihodździ», - zajaviŭ kiraŭnik dziaržavy. Alaksandr Łukašenka adznačyŭ, što ŭ jaho ŭžo jość vopyt raboty z rasijanami. «Jany i MTZ chacieli zamianić, niedzie na Vałhahradskim zavodzie niešta chacieli stvaryć. Ale da hetaha času kuplajuć našy traktary. Hetak ža kuplajuć i takuju pradukcyju», - kanstatavaŭ Prezident.
Jon adznačyŭ, što heta padšturchnuła jaho pryjechać na pradpryjemstva, kab asabista pierakanacca ŭ tym, ci moža jano vyrablać dastojnuju pradukcyju, abo ž jaho para pradavać.
«U vyniku ja ŭbačyŭ, što ni vašy kiraŭniki, ni novy ministr nie chočuć pradavać zavod. My siońnia možam pracavać, pracavać razam z rasijanami pa kaapieracyi. My zaŭsiody byli abaviazkovymi ludźmi i vielmi stroha vykonvali kantrakty i damoŭlenaści z našaj Rasijskaj Fiederacyjaj. My hatovy pracavać», - skazaŭ kiraŭnik dziaržavy.
Alaksandr Łukašenka padkreśliŭ, što jak kiraŭnictvu MZKC, tak i inšych pradpryjemstvaŭ pastaŭlena zadača nie stracić rasijski rynak.
«Tak, nam tam davodzicca kankuryravać. Ale kali nie budzie kankurencyi, vy raści nie budziecie, vy adstaniecie, i ŭ rešcie rešt jany buduć zakuplać niedzie na Zachadzie anałahičny tavar, ale nie naš», - źviarnuŭ uvahu Łukašenka. Jon dadaŭ, što kankurencyja pavinna być dobrasumlennaj. Pavodle jaho słoŭ, tamu Biełaruś i ŭstupiła ŭ Jeŭrazijski ekanamičny sajuz, kab byli ahulnyja praviły. Pakul MZKC nie prajhraje ŭ hetaj kankurencyi, źjaŭlajučysia nie pryvatnym pradpryjemstvam. «Značyć, i dziaržaŭnyja mohuć pracavać», - adznačyŭ Prezident.
«My pakul pradavać heta pradpryjemstva nie majem namieru. Jano pavinna pracavać u nas. Heta pakazčyk, jak možna i ŭ składanych umovach pracavać», - padkreśliŭ kiraŭnik dziaržavy.
Pry hetym jon dadaŭ: «Ale kali $3 młrd pakładuć, budziem razhladać heta pytańnie.
Tady ja budu adkazvać za adno: kab vašy pravy jak členaŭ pracoŭnaha kalektyvu nie byli parušany, kab atrymlivali narmalnuju zarpłatu i kab nie rulili vami nie tak, jak treba. Tamu što, chto b siudy ni pryjšoŭ, heta nie ich kraina, nie ich ziamla, i ludzi čužyja. Vycisnuć, atrymać narmalny tavar, mienš zapłacić - my heta ŭžo viedajem. Ale jany taksama viedajuć majo staŭleńnie da hetaha». Jon nahadaŭ, što ŭ Biełarusi ŭžo viartali dziaržavie pradpryjemstvy, dzie niadobrasumlenna pracavaŭ pryvatnik, i ciapier jany vydatna pracujuć. «Tamu heta adna z funkcyj budučaha prezidenta — abaranić ludziej i nie dać ich u kryŭdu», — padkreśliŭ Alaksandr Łukašenka.
