fota Dźmitryja Ražkova, Tut.by
Były hienieralny dyrektar AAT «Barysaŭdreŭ» Uładzimir Malcaŭ 2 lipienia vyzvaliŭsia pa amnistyi z mahiloŭskaj papraŭčaj kałonii ahulnaha režymu № 15.
Jon vyjšaŭ z kałonii kala 16.00. Malcava sustrakali žonka, baćka i brat.
fota Dźmitryja Bruško, Tut.by
fota Dźmitryja Bruško, Tut.by
Jak stała viadoma BiełaPAN, rašeńnie ab vyzvaleńni Malcava było pryniataje 1 lipienia kamisijaj pa prymianieńni amnistyi, jakaja zasiadała ŭ mahiloŭskaj kałonii, a siońnia ranicaj — zaćvierdžanaje prakuroram.
Hiendyrektar «Barysaŭdreva» byŭ zatrymany ŭ sakaviku 2014 hoda. U śniežni Minski abłasny sud pryznaŭ jaho vinavatym u złoŭžyvańni ŭładaj ci słužbovymi paŭnamoctvami i pryhavaryŭ da troch hadoŭ pazbaŭleńnia voli ŭ kałonii ŭzmocnienaha režymu. Akramia taho, Malcava abaviazali viarnuć pradpryjemstvu 1 młrd. 906 młn. rubloŭ. Na pahašeńnie doŭhu pavinna była być nakiravanaja ŭsia raniej aryštavanaja asabistaja majomaść byłoha hiendyrektara.
U krasaviku hetaha hoda Viarchoŭny sud Biełarusi pierakvalifikavaŭ abvinavačańnie Malcavu na miakčejšaje i skaraciŭ jamu termin pazbaŭleńnia voli da dvuch z pałovaj hadoŭ u kałonii ahulnaha režymu. Z rašeńnia suda pieršaj instancyi taksama było vyklučana abvinavačańnie ŭ naniasieńni «Barysaŭdrevu» ŭronu.
Akramia taho, Malcaŭ padpaŭ pad dziejańnie adrazu dźviuch amnistyj — 2014 i 2015 hadoŭ, u vyniku čaho termin jaho pakarańnia skaraciŭsia jašče na adzin hod.
Varta zaznačyć, što kryminalnaja sprava Uładzimira Malcava atrymała šyroki hramadski rezanans. Jon byŭ pryznačany na pasadu hiendyrektara AAT «Barysaŭdreŭ» asabista prezidentam padčas naviedvańnia Alaksandram Łukašenkam barysaŭskaha pradpryjemstva ŭ listapadzie 2012 hoda. Aburany situacyjaj z madernizacyjaj «Barysaŭdreva», Łukašenka tady rasparadziŭsia zvolnić byłoha kiraŭnika i pryznačyć zamiest jaho Uładzimira Malcava, jaki zajmaŭ pasadu namieśnika hiendyrektara pa techničnym uzbrajeńni. Takim čynam, da svajho aryštu ŭ sakaviku 2014-ha Malcaŭ kiravaŭ pradpryjemstvam usiaho paŭtara hoda.
Na pres-kanfierencyi 29 studzienia 2015 hoda Łukašenka, adkazvajučy na pytańnie, ci nie ličyć jon, što pryhavor, vyniesieny byłomu hiendyrektaru «Barysaŭdreva», zanadta žorstki, zajaviŭ, što nie byŭ prychilnikam žorstkaha pakarańnia Malcava i paabiacaŭ asabista aznajomicca z padrabiaznaściami jaho kryminalnaj spravy.
Zhadaŭšy nieadnaznačnuju reakcyju hramadskaści na kryminalny pieraśled byłoha kiraŭnika barysaŭskaha pradpryjemstva, Łukašenka zajaviŭ: «Ja papiaredziŭ pravaachoŭnyja orhany: niahledziačy na toje, što ja vielmi niezadavoleny madernizacyjaj u Barysavie, što tam biezhaspadarčaści chapała, nielha padstrojvacca ŭ hetym płanie i łamać los čałavieku. Tamu vy, ad śledčaha da suda, adkazvajecie pierad kiraŭnikom dziaržavy, kab rašeńnie vaša było zakonnym. Ja ich papiaredziŭ».
Niepasredna padčas pres-kanfierencyi Łukašenka daručyŭ kiraŭniku svajoj administracyi padać jamu padrabiaznuju infarmacyju pa spravie Malcava z tłumačeńniem, čamu jamu byŭ vyniesieny mienavita taki pryhavor.
