Alaksandr Łukašenka 19 červienia padpisaŭ ukaz № 251. Im dapaŭniajecca pieralik administracyjnych pracedur, jakija ažyćciaŭlajucca dziaržaŭnymi orhanami i inšymi arhanizacyjami pa zajavach hramadzian, zaćvierdžany ŭkazam ad 26 krasavika 2010 hoda № 200.
Jak paviedamlaje pres-słužba prezidenta, pieralik dapaŭniajecca takoj praceduraj, jak vydača prafiesijnaha siertyfikatu tvorčaha rabotnika. U adpaviednaści z dekretam prezidenta ad 2 krasavika 2015 hoda № 3 «Ab papiaredžańni sacyjalnaha ŭtrymanstva» hramadzianin pryznajecca ŭdzielnikam finansavańnia dziaržaŭnych raschodaŭ u pieryjad ažyćciaŭleńnia tvorčaj dziejnaści ŭ jakaści tvorčaha rabotnika. Hety status paćviardžajecca tvorčym sajuzam, členam jakoha jon źjaŭlajecca, abo prafiesijnym siertyfikatam, jaki vydajecca ŭ adpaviednaści z zakanadaŭstvam.
U metach zabieśpiačeńnia prava hramadzianina na paćviardžeńnie statusu tvorčaha rabotnika i pryznańnia jaho asobaj, jakaja ŭdzielničaje ŭ finansavańni dziaržaŭnych raschodaŭ, ukazam ustanaŭlivajecca paradak vydačy adpaviednaha siertyfikatu. Jon vydajecca biaspłatna ekśpiertnaj kamisijaj pa paćviardžeńni statusu tvorčaha rabotnika pry Ministerstvie kultury ŭ miesiačny termin z dnia padačy zajavy i dziejničaje na praciahu piaci hadoŭ.
Ukazam praduhledžana taksama, što dziaržaŭnyja archiŭnyja ŭstanovy i terytaryjalnyja archivy miascovych vykanaŭčych i rasparadčych orhanaŭ buduć vydavać archiŭnyja daviedki i inšyja dakumienty z utrymańniem archiŭnaj infarmacyi na praciahu 15 dzion z dnia padačy zajavy (pry nieabchodnaści dadatkovaha vyvučeńnia i pravierki — na praciahu miesiaca).
Kali zapyt tyčycca majomasnych i spadčynnych pravoŭ hramadzian, to za pradastaŭleńnie archiŭnaj infarmacyi źbirajecca płata ŭ pamiery ad 0,5 da adnoj bazavaj vieličyni. Vydača archiŭnaj infarmacyi pa inšych zapytach sacyjalna-pravavoha charaktaru ažyćciaŭlajecca biaspłatna.
Ukaz № 251 nabyvaje moc paśla jaho aficyjnaha apublikavańnia.
