Stali viadomyja niekatoryja detali tendaru, jaki abviaściŭ «Biełtelekam» na kuplu abstalavańnia, što dazvalaje źbirać i zachoŭvać historyju naviedvańniaŭ sajtaŭ karystalnikami, a taksama błakavać internet-resursy. Adna z funkcyj novaha aparatna-prahramnaha kompleksu (APK) — zamiena rekłamy na internet-sajtach.
Jak vynikaje z konkursnych dakumientaŭ, kopijaj jakich maje TUT.BY, udzielnik tendaru pavinien dadatkova pradstavić rašeńnie, jakoje dazvalaje realizavać dźvie funkcyi — supraćdziejańnie machlarstvu na sietkach elektrasuviazi i raźmiaščeńnie kantekstnaj rekłamy. I kali ź pieršaj opcyjaj byccam usio zrazumieła, to z druhoj jość pytańni. Vierahodna, heta razumiejuć i ŭ «Biełtelekamie», tamu pakidajuć prava ŭnieści «dapaŭnieńni z metaj kankretyzacyi patrabavańniaŭ».
Pakul ža miarkujecca, što APK «pavinien mieć mahčymaść pravodzić zamienu rekłamy na internet-resursach, da jakich źviartajecca kankretny karystalnik, na rekłamu, jakuju zadaje zakazčyk», h.zn. «Biełtelekam».
Pry hetym APK «pavinien rabić zamienu hnutka» (nie rabić dadzienuju zamienu dla asobnych sajtaŭ, zadadzienych zakazčykam).
APK pavinien dazvalać rabić «zamienu jak na fiksavanuju rekłamu zakazčyka, tak i na kantekstnuju rekłamu, zychodziačy z bazy dadzienych pa kłasifikacyi karystalnikaŭ pa charaktary naviedvalnych resursaŭ».
APK pavinien mieć «partał z prapanavanaj rekłamaj z metaj pradastaŭleńnia raspracoŭščykam internet-sajtaŭ spasyłak i skryptoŭ dla raźmiaščeńnia ich na svaich resursach, vieści ŭlik kolkaści pierachodaŭ karystalnikaŭ pa dadzienych spasyłkach i skryptam».
Ź inšych cikaŭnych detalaŭ varta adznačyć, što pry acency konkursnych prapanoŭ da pradukcyi biełaruskaha pachodžańnia budzie ŭžytaja prefierencyjnaja papraŭka ŭ pamiery 15%.
Cikava, što pieramožca tendaru pavinien zabiaśpiečyć navučańnie 10 čałaviek «Biełtelekama» abo jaho kandydataŭ u termin da 30 śniežnia 2015 na ruskaj movie ŭ halinie funkcyjanavańnia i ekspłuatacyi abstalavańnia APK, jakoje miarkujecca pastaŭlać. Śpiecyjalistam, što paśpiachova prajšli navučańnie, pavinny być vydadzieny adpaviednyja siertyfikaty.
Pavodle zajaŭki, rehulataru nieabchodna kupić «aparatna-prahramny kompleks, jaki ažyćciaŭlaje zbor i zachoŭvańnie źviestak pra naviedvańnie karystalnikam Internet-resursaŭ, błakavańnie Internet-resursaŭ». Cana, pa jakoj dziaržaŭnaja kampanija hatova kupić dadzieny kompleks, nie vydajecca.
Prapanova pavinna być aformlena da 16 červienia 2015 hoda, a pastaŭka abstalavańnia pavinna adbycca da siaredziny vieraśnia hetaha hoda.
U «Biełtelekamie» atrymać kamientar nie ŭdałosia.
Nahadajem, što ŭ lutym Ministerstva suviazi i infarmatyzacyi abaviazała ŭsich biełaruskich internet-pravajdaraŭ zachoŭvać historyju naviedvańniaŭ sajtaŭ karystalnikami. Źviestki pavinny zachoŭvacca na praciahu hoda z momantu akazańnia pasłuhi.
Akramia taho, sioleta vyznačany paradak błakavańnia i razbłakavańnia sajtaŭ u Biełarusi, a taksama adkaznyja za heta dziaržorhany. Sajt moža być zabłakavany, kali jamu na praciahu hoda vyniesiena dva i bolš piśmovyja papiaredžańni Ministerstva infarmacyi, jon źmiaščaje materyjały, nakiravanyja na abarot narkotykaŭ, inšuju infarmacyju, zabaronienuju abo abmiežavanuju da raspaŭsiudžvańnia ŭ krainie, a taksama kali jaho ŭładalniki nie vykanali zakonnaje patrabavańnie dziaržorhanaŭ ab likvidacyi parušeńniaŭ zakanadaŭstva Biełarusi ab ŚMI.
