Praciah kłasičnaj sieryi videahulniaŭ Fallout budzie, paviedamiła studyja Bethesda. Hulnia vyjdzie dla piersanalnych kampjutaraŭ, a taksama dla kansolaŭ Sony Playstation 4 i Xbox One. Inšuju infarmacyju možna atrymać chiba z trejlera na sajcie fallout4.com.
Miarkujučy pa trejlery, dziejańnie pieraniasiecca ŭ postapakaliptyčny Bostan i razharniecca vakoł schovišča 111. Trejler nie demanstruje nadzvyčajnaj pa siońniašnich mierkach jakaści karcinki.
Na videa možna zaŭvažyć, što śviet stanie bolš śvietłym i kalarovym, a harady, mahčyma, bolš prastornymi.
Bolš padrabiazna pra hulniu abiacajuć raspavieści 14 červienia na pres-kanfierencyi ŭ miežach vystavy E3 ŭ Łos-Anželesie. Navat prykładnaja data vychadu pakul zastajecca nieviadomaj.
***
Sieryja Fallout raspačałasia rolevaj 2D-hulnioj 1997 hoda, praz hod atrymała blizki da aryhinału praciah Fallout 2. Hulni mieli vialiki dla svajho času pośpiech praz nasyčany piersanažami j historyjami, vializny adkryty śviet. Fallout pakazvaŭ postapakaliptyčny śviet prykładna takim, jakim jaho ŭjaŭlali ŭ 1950-ja.
Paśla nie samaj papularnaj Fallout Tactics 2001 hoda sieryja «zahłochła», a raspracoŭščyk sieryi, Black Isle Studios, byŭ rasfarmavany. Fallout 3 vyjšaŭ tolki ŭ 2008 hodzie ŭžo jak 3D-hulnia na miažy RPG i «stralałki». Jaho raspracoŭvała ŭžo inšaja studyja, Bethesda, što zrabiła hulniu bolš padobnaj da svajho paśpiachovaha prajektu The Elder Scrolls IV: Oblivion. Hulnia mieła pośpiech, chacia niekatoryja fanaty narakali na nieadpaviednaść duchu aryhinalnych Fallout 1-2.
Praz dva hoda Obsidian Entertainment, što była zasnavanaja «na ruinach» Black Isle, vypuściła Fallout: New Vegas, što bazavaŭsia na Fallout 3, ale viartaŭ sieryju bližej da vytokaŭ.
Pra ŭdzieł Obsidian u raspracoŭcy Fallout 4 nie paviedamlajecca.
