Teleskop, što dapamoža znajści niebiaśpiečnaje dla stancyi śmiećcie. Fota: RIKEN
Kaśmičnyja aparaty treba abaraniać ad śmiećcia, pakinutaha čałaviekam na arbicie. Dziela hetaha japonski instytut fizika-chimičnych daśledavańniaŭ prapanavaŭ ustalavać na stancyi łaziernuju harmatu, piša Space.com.
Ultrafijaletavy łazier, što hienieruje kala 10 tysiač impulsaŭ na siekundu, zmoža bić pa kaśmičnym śmiećci na adlehłaści da 100 km. Vypramieńvańnie łaziera nahreje abjekty, u vyniku vypareńnia jany skirujucca ŭ bok Ziamli dy spalacca ŭ atmaśfiery.
Pakul takaja kaśmičnaja harmata tolki raspracoŭvajecca.
Daśledčyki źbirajucca pravieryć na MKS źmienšanuju 10-vatnuju madel łaziera. Kali prajekt z MKS projdzie paśpiachova, navukoŭcy kažuć ab mahčymaści stvareńnia asobnaha kaśmičnaha aparata z łazieram na 500 tysiač vat, što zmoža źbivać kaśmičnaje śmiećcie na adlehłaści da 800 km. Taki aparat budzie źbivać pa abjekcie kožnyja 5 chvilin.
Kab svoječasova znachodzić kaśmičnaje śmiećcie, daśledčyki prapanujuć skarystacca japonskim kaśmičnym teleskopam Extreme Universe Space Observatory, što płanujecca ŭstalavać na MKS u 2017-2018 hodzie. Pieršapačatkova raspracavanaja dla daśledavańnia kaśmičnych pramianioŭ, jana moža vykanać i funkcyi pošuku niebiaśpiečnaha kaśmičnaha śmiećcia, što na vysokaj chutkaści nabližajecca da MKS.
***
Abjom kaśmičnaha śmiećcia, što čałaviek pakidaje na arbicie, raście štohod. Im ličacca ŭsie štučnyja abjekty ci frahmienty abjektaŭ, što nie vykarystoŭvajucca čałaviekam — ad niaspraŭnych spadarožnikaŭ da zaklopak ci hajek. Navat samyja małyja abjekty pahražajuć kaśmičnym stancyjam — piasčynka na arbicie lacić z chutkaściu ŭ dziasiatki tysiač km/hdz i zdolnaja paškodzić škło šatła. Ahulnaja masa kaśmičnaha śmiećcia pieravyšaje 5 tysiač ton.
