«Miarkuju, nichto z paleantołahaŭ nie čakaŭ, što rannija terapody mohuć evalucyjanavać u niešta takoje», — kamientuje The Verge paleantołah Univiersiteta Čyli Alaksandr Varhas daśledavańnie, apublikavanaje ŭ časopisie Science.
Chilesaurus diegosuarezi niby «źlepleny» z absalutna roznych dynazaŭraŭ.
Kali siamihadovy Dyjeha znajšoŭ u Čyli skamianiełyja kostki, jaho baćka, paleantołah Manuel Suarez, vyrašyŭ, što kostki naležali niekalkim raniej nieviadomym vidam. Ale dalejšyja daśledavańni pakazali, što chłopčyk adkryŭ praktyčna poŭnyja škilety 10 dynazaŭraŭ adnoha vidu.
Čylizaŭr Dyjeha Suareza byŭ prazvany «dynazaŭram-kačkadziubam», bo spałučaje, zdavałasia by, niespałučalnaje: zadnija łapy i zuby ad zaŭrapodaŭ (travajednyja čaćvieranohija jaščary z daŭžeznaj šyjaj) i piarednija dvupałyja łapy paźniejšaha drapiežnika tyranazaŭra. Padobna, što čylizaŭry byli viehietaryjancami, chacia i naležali da daminantnaj hrupy drapiežnikaŭ svajho času.
Daśledčyki šukajuć prodkaŭ čylizaŭraŭ, kab zrazumieć, jak rannija terapody nabyli takuju dziŭnuju formu, jakuju paźniej častkova pazyčyli tyranazaŭry. Adkryćcio takich prodkaŭ paćvierdzić teoryju ab tym, što čylizaŭry byli nie prosta vypadkovym evalucyjnym skačkom.
Sam pa sabie fakt znachodžańnia čylizaŭraŭ dakazvaje, što radykalna novyja formy dynazaŭraŭ usio jašče mohuć być znojdzienyja.
