Lidar «Načnych vaŭkoŭ» daŭ presavuju kanfierencyju ŭ konsulstvie Rasiei ŭ Bieraści, dzie padziakavaŭ Alaksandru Łukašenku za dobry pryjom.
Alaksandr Załdastanaŭ prybyŭ u Bieraście, kab padtrymać udzielnikaŭ motaprabiehu, jakim 27 krasavika zabaranili ŭjezd u Polšču. Jany taksama ŭziali ŭdzieł u pres-kanfierencyi.
Pierad pačatkam pres-kanfierencyi Załdastanaŭ začytaŭ «pasłańnie vieteranam Jeŭropy ad vieteranaŭ Arłoŭskaj i Tulskaj abłaściej» i paabiacaŭ, što praz dva dni hetaje pasłańnie budzie dastaŭlenaje pa raniej abvieščanym maršrucie.
Takim čynam, Alaksandar Załdastanaŭ zapeŭniŭ prysutnych žurnalistaŭ, što motaprabieh «Načnych vaŭkoŭ» pa Jeŭropie adbudziecca. Adnak admoviŭsia paviedamić, jakim čynam budzie ździejśnienaja akcyja i chto voźmie ŭ joj udzieł.
Kiraŭnik hrupy bajkieraŭ Andrej Babroŭski ŭdakładniŭ, što na polskaj miažy vizu anulavali tolki jamu. «Astatnim abmiežavany ŭjezd u Polšču», — skazaŭ Babroŭski.
Toje, što ŭčora adbyłosia na polskaj miažy, Załdastanaŭ nazvaŭ «tannym cyrkam»: «Jeduć 20 čałaviek absalutna adkrytych i biez zbroi z vysokarodnaj misijaj. Jedziem na mahiły, na mohiłki. Nas sustrakajuć adnadumcy. A pierad nami pačynajuć vynosić dekaracyi, sa zbrojaj prychodziać ludzi ŭsie ŭ bronikach, pačynajuć pravodzić vobšuki, lezuć u bializnu i h. d. Heta teatralnaja pastanoŭka, jana tannaja. Ja inšaha słova nie mahu znajści, — skazaŭ Załdastanaŭ. — Paśla nam raskazvajuć pra Saviecki Sajuz i pałochajuć historyjami pra tatalitarnaje minułaje. My dakranulisia da tvaru demakratyi. Heta nie tvar, a hrymasa».
Na prośbu radyjo «Svaboda» prakamientavać, čamu ŭ Biełarusi ŭdzielnikaŭ motaprabiehu sustrakali na vysokim aficyjnym uzroŭni, Alaksandr Załdtastanaŭ adrehavaŭ tak: «Heta vy arhanizavali hetuju situacyju, kali hetaja historyja dajšła da ŭzroŭniu pieršych asobaŭ. Vy zrabili ź jaje žachlivuju situacyju. Vy sami stvaryli hetuju situacyju, kali stali arhanizoŭvać supraćdziejańnie našamu maršrutu».
Babroŭski ŭdakładniŭ, što bajkiery nie źviartalisia da aficyjnych biełaruskich uładaŭ z prośbaj pra spryjańnie, i pryjom u Biełarusi — heta inicyjatyva samich biełaruskich uładaŭ.
«Za heta dziakuj vialiki Alaksandru Łukašenku, — skazaŭ Załdastanaŭ. — Heta jahonaja asabistaja inicyjatyva. Usia hetaja situacyja, usia hetaja infarmacyjnyja prapahadysckaja demakratyčnaja mašyna na nas dała zboj».
A polskamu žurnalistu Załdastanaŭ skazaŭ: «Vy dahulajeciesia z hetaj rusafobijaj. Inšym razam bajaźlivy čałaviek, zahnany ŭ kut, moža strelić. Voś čym moža skončycca hetaja isteryja, ciemrašalstva. Bajaźlivy čałaviek moža nacisnuć na kurok».
