Upraŭleńniem Śledčaha kamiteta pa Minskaj vobłaści zavieršanaje śledstva ŭ dačynieńni da siamiejnaj pary, jakija arhanizavali parnastudyju pry dapamozie internetu, paviedamiła BiełaPAN aficyjny pradstaŭnik USK Taćciana Biełanoh.
Nahadajem, 25-hadovaja hramadzianka Rasii, jakaja maje prava na žycharstva ŭ Biełarusi, sumiesna z 31-hadovym mužam z metaj atrymańnia hrašovaha ŭznaharodžańnia ŭ pieryjad z červienia pa śniežań 2014 hoda arhanizavali raspaŭsiudžvańnie i rekłamavańnie parnahrafičnych materyjałaŭ i vidarysaŭ u internecie.
Ustanoŭlena, što ŭvieś praces złačynnaj dziejnaści adbyvaŭsia ŭ arandavanaj kvatery ŭ Minsku. Žančyna najmała dziaŭčat, jakija za hrošy vykonvali lubyja prośby pa zadavalnieńni sieksualnych patrebaŭ karystalnikaŭ internetu ŭ režymie anłajn.
Śledstvam ustanoŭlenyja 14 dziaŭčat, jakija pracavali ŭ studyi, a taksama pryblizna 20 dziaŭčat, jakich abvinavačvanaja sprabavała zavierbavać. Mužčyna zajmaŭsia techničnym absłuhoŭvańniem kamp`iutarnaha abstalavańnia, techniki, jakaja zabiaśpiečvaje virtualnyja znosiny karystalnikaŭ internetu. Hrošy ad klijentaŭ pieraličvalisia abvinavačanym na aformlenyja na padstaŭnych asob płaciežnyja karty zamiežnych bankaŭ.
U miežach śledčych dziejańniaŭ praviedzienyja vobyski, padčas jakich vyjaŭlenaja i kanfiskavanaja kamp`iutarnaja technika, mabilnyja telefony i inšyja dokazy złačynnaj dziejnaści abvinavačanych. Da materyjałaŭ kryminalnaj spravy dałučanyja vyniki mastactvaznaŭčaj ekśpiertyzy, na padstavie jakich tranślavanyja materyjały pryznanyja parnahrafičnymi.
Pavodle vynikaŭ rasśledavańnia dziejańni abvinavačanych kvalifikavanyja na padstavie č. 2 art. 343 KK (vyrab, raspaŭsiudžvańnie i rekłamavańnie parnahrafičnych materyjałaŭ i vidarysaŭ hrupaj asob pavodle papiaredniaj zmovy z vykarystańniem hłabalnaj kamp`iutarnaj sietki internet).
Miera strymańnia ŭ dačynieńni da abvinavačanych z momantu ich zatrymańnia nie źmianiałasia — jany znachodziacca pad vartaj.
Kryminalnaja sprava pieradadzienaja ŭ prakuraturu dla nakiravańnia ŭ sud.
