Rasija moža ŭvieści ŭ dačynieńni da Biełarusi sankcyi ŭ naftavaj śfiery, kali nie buduć dasiahnutyja damoŭlenaści pa klučavych miždziaržaŭnych pytańniach. Takoje mierkavańnie vykazali BiełaPAN ekśpierty, kamientujučy płany rasijskich uład razhledzieć u červieni pytańnie ab skaračeńni pastavak nafty ŭ Biełaruś.
Nahadajem, na minułym tydni vice-premjer Biełarusi Uładzimir Siamaška paviedamiŭ, što Biełaruś prypyniła pastaŭki naftapraduktaŭ na rasijski rynak z-za niavyhadnych cenavych umoŭ, jakija tam skłalisia. U adkaz Minenierha Rasii zajaviła, što z-za niedapastavak biełaruskich naftapraduktaŭ na rasijski rynak mohuć być skaročanyja pastaŭki nafty ŭ Biełaruś.
Na dumku rasijskich analitykaŭ, niahledziačy na niepryvabnuju cenavuju kanjunkturu, Biełarusi daviadziecca pastaŭlać naftapradukty ŭ Rasiju.
«Biełaruś u ciapierašnich umovach sprabuje maksimizavać svoj prybytak, pastaŭlajučy naftapradukty na źniešnija rynki. Hety padychod možna było zrazumieć, kali b adnosiny pamiž Maskvoj i Minskam u naftavaj śfiery byli poŭnaściu rynkavymi, adnak jany takimi nie źjaŭlajucca», — adznačyŭ u kamientaryi BiełaPAN kiraŭnik siektara ekanamičnaha departamienta rasijskaha Instytuta enierhietyki i finansaŭ Siarhiej Ahibałaŭ.
Jon nahadaŭ ab pratakole pa pytańniach biełaruska-rasijskaha ŭzajemadziejańnia ŭ naftavaj śfiery, padpisanym vosieńniu 2014 hady, zhodna ź jakim vyvaznyja pošliny na ekspartavanyja naftapradukty ŭ 2015 hodzie pavinny poŭnaściu zaličvacca ŭ biełaruski biudžet, a nie ŭ rasijski, jak heta było da 2014 hoda ŭklučna.
«Naŭrad ci možna ŭjavić, što Biełaruś, atrymaŭšy ŭ 2015 hodzie poŭnaje viartańnie naftapošlin u svoj biudžet, zmoža admovicca ad pastavak naftapraduktaŭ na rasijski rynak», — skazaŭ Ahibałaŭ.
Kali ž biełaruski bok nie zachoča pastaŭlać bienzin u Rasiju, spasyłajučysia na niavyhadnyja ceny, Kreml moža skaracić pastaŭki nafty ŭ Biełaruś. «Takoje raźvićcio padziej vyklučyć nielha, mahčymaściaŭ uździejańnia na Biełaruś u Maskvie bolš, čym raniej. U Biełarusi siońnia niama kozyra, jaki byŭ letaś, kali pytańni ŭ naftavaj śfiery źviazvalisia Minskam z pryniaćciem dakumientaŭ ab stvareńni Jeŭrazijskaha ekanamičnaha sajuza», — ličyć rasijski ekśpiert.
Pratakoł pa pytańniach supracoŭnictva ŭ naftavaj śfiery, padpisany minułaj vosieńniu, praduhledžvaje, što Biełaruś pastavić na rasijski rynak da 2015 hoda 1,8 młn. ton aŭtamabilnaha bienzinu. Dakumient praduhledžvaje, što ŭ vypadku niedapastavak paliva Rasija moža skaracić pastaŭki nafty ŭ Biełaruś.
Biełaruski ekśpiert pa enierhietyčnych pytańniach Taćciana Manionak ličyć, što isnujuć faktary, jakija mohuć pa-roznamu ŭpłyvać na dalejšy chod raźvićcia situacyi ŭ naftavaj śfiery.
«Śviatkavańnie 70-hodździa Pieramohi ŭ Vialikaj Ajčynnaj vajnie, pieradvybarnaja kampanija ŭ Biełarusi — usio heta havoryć na karyść taho, što palityčny fon u biełaruska-rasijskich adnosinach nie pavinien nahniatacca sioleta», — miarkuje Manionak.
U toj ža čas jana nie vyklučaje, što kali rasijski bok pačnie akcentavać uvahu na inšych momantach, abvastreńnie adnosin u naftavaj śfiery mahčymaje. «My bačym, što rasijski bok niezadavoleny tym, jak realizujucca intehracyjnyja prajekty ŭ pramysłovaj śfiery. Vyklikajuć niezadavolenaść u Rasii siońnia i handlovyja barjery (biełaruskija instytuty śpiecimparcioraŭ), jakija abmiarkoŭvalisia padčas niadaŭniaha vizitu rasijskaha vice-premjera ŭ Minsk. Kab zrabić Minsk bolš zhavorlivym, Maskva, nie vyklučana, moža skaracić pastaŭki nafty ŭ Biełaruś», — miarkuje Manionak.
