Staršynia Partyi BNF Alaksiej Janukievič i siabra BSDP (Hramada) Taćciana Karatkievič nakiravali ŭ Hałoŭnaje śledčaje ŭpraŭleńnie Śledčaha kamitetu Respubliki Biełaruś chadajnictva ab vyzvaleńni viadomaha biznesoŭca z-pad varty na ŭmovach asabistaha paručalnictva.
Apazycijnyja palityki zajaŭlajuć, što hatovyja paručycca za viadomaha ajčynnaha pradprymalnika ŭ śfiery vysokich technałohijaŭ.
Viadomy IT-pradprymalnik byŭ uziaty pad vartu ŭ sakaviku. Jamu pradjaŭlenaje abvinavačańnie ŭ niezakonnaj pradprymalnickaj dziejnaści. Artykuł praduhledžvaje pazbaŭleńnie voli na termin da siami hadoŭ z kanfiskacyjaj majomaści.
«My ličym, što ŭtrymańnie pad vartaj adnaho z najbolš paśpiachovych ajčynnych pradprymalnikaŭ nanosić vialikuju škodu imidžu Biełarusi jak pierśpiektyŭnaha centra raźvićcia u śfiery infarmacyjnych technałohijaŭ, padryvaje aŭtarytet zamiežnych inviestaraŭ da našaj krainy. Heta ŭsio vykliča uciečku kapitałaŭ i adjezd z krainy vysokakvalifikavanych śpiecyjalistaŭ i pradprymalnikaŭ. My zajaŭlajem chadajnictva pra vyzvaleńnie z-pad varty biznesoŭcy dla taho, kab adznačyć vialikuju hramadskuju ŭvahu da hetaj spravy i spryjać minimizacyi niehatyŭnych nastupstvaŭ utrymańnia pad vartaj da suda viadomaha biznesoŭca», — adznačyli Janukievič i Karatkievič.
