Staronka 404 «UKantakcie» — takoj moža stać raździeł aŭdyjo
Rasijski antypiracki zakon z 1 maja raspaŭsiudzicca nie tolki na filmy, ale i na muzyku, knihi i prahramnaje zabieśpiačeńnie.
Kab paźbiehnuć błakiroŭki, muzyčny raździeł mohuć zakryć da zaklučeńnia damovaŭ.
Pakul «Raskamnadzor» prasiŭ nie vysoŭvać pretenzij «UKantakcie» adrazu 1 maja. «Pahladzim, jak kampanija budzie pracavać paśla 1 maja», — skazaŭ RBK hiendyrektar rasijskaj Asacyjacyi pa abaronie aŭtarskich pravoŭ u internecie Aleh Kaleśnikaŭ. Maŭlaŭ, vialikim kampanijam treba bolš času, kab adaptavacca da zakonaŭ.
Sa žniŭnia 2013 hoda ŭ Rasii byŭ pryniaty zakon, što dazvalaŭ błakavać sajty za nielehalny videakantent — filmy, sieryjały i telepieradačy. Ź pirackim videa «UKantakcie» bolš-mienš razabrałasia: siońnia mnohija pirackija videa, zahružanyja karystalnikami sacsietki, zakrytyja dla prahladu.
Napiaredadni pryniaćcia antypirackaha zakonu sacsietka sprabavała vydalić i pirackuju muzyku pa patrabavańni pravaŭładalnikaŭ (Universal Music Group, Warner UK Music Group i Sony Music). Praz peŭny čas amal usia pirackaja muzyka viarnułasia.
A ŭsio heta praŭda nie pirackaja muzyka?
Ź niekatorymi pravaŭładalnikami, mahčyma, damovilisia, ale mnohija dahetul abvinavačvajuć «UKantakcie» ŭ piractvie. Sacsietka, naprykład, uniesienaja ŭ «śpis 301» Handlovaha pradstaŭnictva ZŠA jak adzin z najbujniejšych parušalnikaŭ aŭtarskaha prava.
Mienavita praz parušeńni aŭtarskaha prava ŭ raździele aŭdyjo prahrama «UKantakcie» dla iPhone była vydalenaja z AppStore u lutym 2014 hoda i viarnułasia tolki ŭ lipieni — užo biez raździełu aŭdyjo, ale sa spasyłkami na pakupku muzyki ŭ iTunes.
Z 23 na 24 krasavika «UKantakcie» anansavała pierazapusk raździełu videa — ciapier jon budzie nahadvać Youtube z rekamiendacyjami lehalnych telesieryjałaŭ i zapisaŭ videabłohieraŭ. Pra reformu raździełu aŭdyjo nie paviedamlałasia.