Sudna ź niekalkimi sotniami mihrantaŭ na borcie zatanuła ŭ Mižziemnym mory na šlachu z Afryki ŭ bok Italii, paviedamlajuć infarmahienctvy sa spasyłkaj na italjanskuju bierahavuju achovu.
Pavodle roznych źviestak, na borcie karabla było ad 500 da 700 mihrantaŭ. Da vyratavalnaj apieracyi padklučylisia italjanskija i maltyjskija sudny. Pavodle zajavy italjanskaha boku, u hetaj apieracyi zadziejničana 20 karabloŭ i 3 viertaloty. Pavodle apošnich dadzienych, vyratavać atrymałasia tolki 28 čałaviek, astatnija ličacca zahinułymi.
Karabiel ź mihrantami pieraviarnuŭsia prykładna ŭ 210 km na poŭdzień ad vostrava Łampieduza (Italija) i ŭ 27 km na poŭnač ad uźbiarežža Livii. Niekatoryja ŚMI paviedamlajuć, što častka mihrantaŭ upała za bort, sprabujučy pryciahnuć uvahu ekipaža handlovaha karabla, jaki prachodziŭ pobač.
Padobnyja incydenty adbyvajucca ŭ hetym rajonie ŭžo nie pieršy raz. Na hetym tydni 400 čałaviek ledź było nie patanuli la bierahoŭ Livii z-za taho, što ich sudna taksama pieraviarnułasia. Mihranty ź Livii stali pradprymać sproby dabracca da Italii paśla taho, jak u livijskaj dziaržavie pačaŭsia ŭzbrojeny kanflikt. Jak praviła, sudny, na jakich iduć uciekačy, pierapoŭnienyja pasažyrami.
