Kala tryccaci maładych ludziej uziali ŭdzieł u masavaj bojcy kala supiermarkieta «Jeŭraopt» na vulicy Nalibockaj u mikrarajonie Kamiennaja Horka ŭ Minsku. U «razborcy» brali ŭdzieł jak chłopcy, tak i dziaŭčaty ad 15 da 25 hadoŭ. Imavierna, heta byli žychary prylehłych damoŭ.
Śviedkam bojki byŭ karespandent «Našaj Nivy». Kala 19.30 12 krasavika maładyja ludzi pabilisia da kryvi ŭ rajonie kramy. Paśla tyja, što byli ŭ mienšaści, adstupili ŭ sam supiermarkiet. Bolšaść ich pieraśledavała. Razborki praciahnulisia kala kasaŭ. Milicyi nie było. Moładź sprabavali suniać supracoŭniki kramy i naviedniki. Kali hałoŭny «praciŭnik», junak u siniaj majstarcy, schavaŭsia siarod kramy, jahonyja «vorahi» ačapili vychady, ale jon zdoleŭ vyrvacca i ŭciačy ŭ kirunku vulicy Prytyckaha.
Maładyja ludzi ŭsio jašče tusavalisia kala vychadaŭ z kramy kala 19.50. U siaho-taho ź ich byli ŭ kroŭ raźbityja brovy i nasy. Jany mieli davoli kryminalny vyhlad: koratka stryžanyja, sa złamanymi nasami, suchaščavyja.
Pavodle niekatoraj infarmacyi, bojka pačałasia z taho, što padletki zastupilisia za svajho 15-hadovaha siabra, jaki sčapiŭsia z trojkaj 25-hadovych koratka stryžanych chłopcaŭ ź siabroŭkami.
