Samy vialiki ŭ Biełarusi načny kłub «Enierhija» z 1 lipienia spyniaje svaju pracu. Kulturna-zabaŭlalny centr pieraabstalujuć u hihancki budaŭničy rynak.
Apošniaja maštabnaja viečarynka ŭ «Enierhii» adbudziecca 27 červienia i budzie pryśviečana 7-hodździu kulturna-zabaŭlalnaha centra. Paśla hetaha pačniecca padrychtoŭka da raźmiaščeńnia handlovych miescaŭ «Budmarkieta».
«Tak, sapraŭdy my začyniajemsia, — kiraŭnik kłubam «Enierhija» Pavał Vialuha. — Z 1 lipienia kłuba bolš nie budzie. Heta źviazana ź nierentabielnaściu pracy abjekta. Raniej naviedvalnaść dasiahała 1 tys. čałaviek za sutki, ciapier — 300-400. Dla nas heta zamała», — rastłumačyŭ Pavieł Vialuha.
Jon ličyć pieršapryčynaj padzieńnia naviedvalnaści kryzis: ludzi aščadžajuć na adpačynku.
Kryzis udaryŭ i pa inšych abjektach, jakija naležać pradpryjemstvu «MiehaJeŭrateks», vałodaje jakim baćka Paŭła — Viktar Vialuha.
Pavieł Vialuha adznačyŭ, što zakryćcio kłuba «Enierhija» naŭrad ci stanie dla Viciebska «niezamiennaj strataj», bo ŭžo ŭ kastryčniku ŭ centry horada adkryjecca zabaŭlalny centr «Vintaž» («Vintage»).
Kulturna-zabaŭlalny centr «Enierhija» ličyŭsia najbolšym načnym kłubam krainy (płošča — 5800 kvadratnych mietraŭ) z samaj doŭhaj barnaj stojkaj (44 mietry). U im mahło źbiracca 4 tysiačy čałaviek. Płošča tancplacu składaje 3 tysiačy kvadratnych mietraŭ, mahutnaść huku — 30 000 Vt.
«Enierhija» pryciahvała maładych ludziej nie tolki vielizarnym prastoraj, ale i demakratyčnaściu ŭvachodnych biletaŭ. Da 22:00 u «Enierhiju» možna było trapić biaspłatna, z 22:00 da 24:00 — za 20 000 rubloŭ, paśla paŭnočy — 50 000 rubloŭ.
