Pałata pradstaŭnikoŭ 9 krasavika ratyfikavała biełaruska-rasijski mižuradavy pratakoł ab asobnych pytańniach prymianieńnia mižnarodnych dahavoraŭ ab paradku vypłaty i zaličeńnia vyvaznych mytnych pošlin (inšych pošlin, padatkaŭ i zboraŭ, jakija majuć ekvivalentnaje dziejańnie) pry vyvazie z terytoryi Biełarusi za miežy mytnaj terytoryi Mytnaha sajuza (MS) nafty syroj i asobnych katehoryj tavaraŭ, vypracavanych z nafty.
Jak paviedamiŭ namieśnik ministra ekanomiki Biełarusi Dźmitryj Kijko, pratakoł byŭ padpisany 21 kastryčnika 2014 hoda ŭ Minsku. Jon zaklikany nivielavać nastupstvy realizacyi Rasijaj padatkovaha manieŭra na ekanomiku Biełarusi.
Pratakoł praduhledžvaje pieraličeńnie ŭ poŭnym abjomie ŭ biudžet Biełarusi z 1 studzienia pa 31 śniežnia 2015 hoda sum vyvaznych mytnych pošlin i pieni ŭ dalarach ZŠA, vypłačanych (spahnanych) pry vyvazie ź Biełarusi za miežy terytoryi MS tavaraŭ, vypracavanych z nafty.
Pry hetym Biełaruś pavinna vykonvać uzhodnieny hrafik pastavak u Rasijskuju Fiederacyju aŭtamabilnych bienzinaŭ, adznačyŭ Kijko.
Nahadajem, sutnaść padatkovaha manieŭra Rasii zaklučajecca ŭ rezkim źnižeńni ekspartnych pošlin na naftu i naftapradukty pry adnačasovym pavyšeńni padatku na zdabyču karysnych vykapniaŭ.
Padatkovy manieŭr pryvioŭ da padaražańnia nafty dla Biełarusi. Jak paviedamiŭ na pres-kanfierencyi ŭ Minsku 18 sakavika staršynia kancerna «Biełnaftachim» Ihar Lašenka, kaeficyjent da suśvietnaj cany dla Biełarusi ciapier składaje 0,7, letaś jon byŭ nižejšy. Pry hetym dachodnaść pierapracoŭki na biełaruskich NPZ u 2015 hodzie źniziłasia i składaje kala $10. Letaś hety pakazčyk byŭ na ŭzroŭni $30.
