Majra Mora, Jaŭhien Prejhierman, Alaksandar Michnievič, Jarasłaŭ Kryvoj na «Minskim dyjałohu».
Biełaruś nie źbirajecca vybirać pamiž Uschodam i Zachadam, a budzie raźvivać uzajemavyhadnyja adnosiny z usimi, — zajaviŭ pad čas mižnarodnaha ekspertnaha forumu «Mienski dyjaloh» pieršy namieśnik ministra zamiežnych spraŭ Biełarusi Alaksandar Michnievič.
«Vybudoŭvajučy sajuźnickija adnosiny z Rasiejskaj Fiederacyjaj, my ni ŭ jakoj miery nia robim heta za košt uščamleńnia Eŭraźviazu. I naadvarot, partnerskija handlova-ekanamičnyja suviazi z EZ nijak nie supiarečać dynamicy našaha ciesnaha ŭzajemadziejańnia z Uschodam», — zajaviŭ jon.
Na dumku Michnieviča, adnabakovy hieapalityčny vybar — heta naahuł pamyłkovy šlach: «Apošnija padziei va Ŭschodniaj Eŭropie nahladna pakazali, nakolki niapravilnaj i kontrpraduktyŭnaj dla dziaržavy moža vyjavicca sama pastanoŭka pytańnia ab adnabakovym hieapalityčnym vybary.
Takaja pastanoŭka pytańnia časam nie pakidaje miesca ni nacyjanalnym intaresam, ni navat zdarovamu sensu», — padkreśliŭ pieršy namieśnik ministra. Michnievič zajaviŭ, što siońnia śviet sutyknuŭsia z novaj hieapalityčnaj realnaściu i novymi vyklikami, nazirajecca biesprecedentnaja napružanaść mižnarodnych adnosinaŭ.
«Usio vyraźniej vyjaŭlajecca kanfrantacyja pamiž hlabalnymi hulcami i sprobaj viartańnia da elementaŭ blokavaha supraćstajańnia», — adznačyŭ jon.
«Na fonie dramatyčnych padziej, jakija adbyvajucca ŭ apošni čas, Respublika Biełaruś stała, pa sutnaści, donaram stabilnaści ŭ rehijonie, adzinaj na hety momant dziaržavaj «Uschodniaha partnerstva», u jakoj adsutničajuć terytaryjalnyja sprečki z susiedziami, niama ŭnutranych kanfliktaŭ na relihijnaj i nacyjanalnaj hlebie», — padkreśliŭ Michnievič.
«Mienski dyjaloh» — forum, arhanizatarami jakoha vystupajuć «Liberalny klub» i Centar Astrahorskaha. Adkryćcio jaho adbyłosia ŭ «Prezident-hateli» ŭ Miensku, pryčym na prapanovu MZS, sam jon maje prajści ŭ «Drazdy-kłubie».
Forum pryśviečany mižnarodnaj palitycy ŭ rehijonie Ŭschodniaj Eŭropy. Na kanferencyju zaprošanyja eksperty ź Biełarusi, Rasiei, Ukrainy, Małdovy dy inšych krain. U forumie biare ŭdzieł kiraŭnica pradstaŭnictva Eŭraźviazu ŭ Biełarusi Majra Mora, pradstaŭniki MZS Biełarusi.
Planavaŭsia ŭdzieł kiraŭnika MZS Ŭładzimiera Makieja, ale jaho na adkryćci zamianiŭ namieśnik ministra Alaksandar Michnievič. Udzielnikam patłumačyli, što jon nia vystupiŭ na adkryćci, bo byŭ u adpačynku.
Heta pieršy za doŭhi čas vypadak, kali vysokapastaŭlenyja asoby z MZS uziali ŭdzieł u forumie, arhanizavanym niezaležnymi analityčnymi instytutami.
