Kampanija Apple praviała 9 sakavika prezientacyju novych praduktaŭ. Hałoŭnym staŭ razumny hadzińnik Apple Watch.
Apple Watch
Apple Watch buduć pradavacca ŭ troch varyjantach karpusoŭ: aluminijevym Sport, stalnym «biezymiennym» i załatym Edition. U kožnym z karpusoŭ jość dva varyjanty pamieraŭ, ź mienšaj i bolšaj dyjahanallu ekranu.
Apple Watch Sport z małym ekranam budzie kaštavać 349 dalaraŭ, «biezymiennaja» Apple Watch z małym ekranam ad 549 da 1049 dalaraŭ. Za viersiju z bolšym ekranam paprosiać lišnija 50 dalaraŭ. Ceny na Apple Watch Gold buduć ad 10 tysiač dalaraŭ.
Da hadzińnikaŭ buduć prapanoŭvacca samyja roznyja ramieńčyki. Usie kambinacyi materyjałaŭ i ramieńčykaŭ možna pahladzieć na sajcie Apple.
Papiarednija zamovy na hadzińniki startujuć 10 krasavika (tady ž hadzińniki źjaviacca na demanstracyjnych stendach u kramach Apple). U ZŠA, Brytanii, Francyi, Hiermanii, Japonii, Aŭstralii i Kitai prodažy Apple Watch startujuć 24 krasavika.
Apple abiacaje, što hadzińniki «pražyvuć» ad adnaho zaradu 18 hadzin.
Apple Watch dazvolać nie tolki bačyć čas (interfiejs hadzińnika dazvolać naładžvać samastojna), ale i čytać paviedamleńni, sačyć za pulsam i projdzienymi krokami, prahladać fota, razmaŭlać z hałasavym pamočnikam Siri dy apłočvać zakupy praz Apple Pay.
Taksama Apple Watch dazvolić prymać telefanavańni i razmaŭlać pa hučnaj suviazi.
Dla hadzińnika ŭžo stvorana mnostva prahram, u ich liku Uber, Shazam, Instagram i inšyja. Blizkamu siabru možna adsyłać namalavanyja palcam malunački albo rytm svajho serca.
MacBook
Taksama Apple prademanstravała abnoŭleny 12-calevy noŭtbuk MacBook. Kampanija zajaŭlaje, što jana vynajšła noŭtbuk nanoŭ.
12-calevy noŭtbuk maje taŭščyniu ŭsiaho 13,1 mm (suprać 17,3 mm papiarednika). Jaho vaha — 910 h.
«Žaleza» noŭtbuka, hałoŭnaja płata, stała na 67% kampaktniejšaj i pazbaviłasia vientylataru — ciapier noŭtbuk pracuje biasšumna. Kłavišy atrymali novy miechanizm dziela bolš miakkaha i dakładnaha chodu dy novuju padśvietku z asobnych śvietładyjodaŭ pad kožnaj kłavišaj. Batareja ciapier zajmaje maksimum miesca ŭ nižniaj častcy noŭtbuka, jana «naniesienaja» admysłovaj technałohijaj — płast na płast, kab kampaktna układvacca ŭ skryŭlenuju formu nižniaj kryški. Tačpad noŭtbuka ciapier adčuvaje siłu naciskańnia i maje vibramator dla zvarotnaj addačy.
U noŭtbuka tolki adzin port — novy dvuchbakovy USB Type C, jaki vykonvaje funkcyi adnačasova zaradnaha hniazda, USB, HDMI, VGA i DisplayPort.
«Serca» novych MacBook — śviežy Intel Core M, vykanany pa 14 nm-techpracesie. Jon pracuje na častacie 1,3 HHc, ale ŭ režymie «turba» razhaniajecca da 2,9 HHc. Akumulatar abiacaje da 10 hadzin aŭtanomnaj raboty pry prahladzie videa.
Ekran maje razroźnieńnie 2304x1440 piksielaŭ. Enierhaspažyvańnie, niahledziačy na toje, źniziłasia na tracinu.
Viersija z 8 Hb apieratyŭnaj pamiaci i SSD-dyskam na 256 Hb budzie kaštavać 1299 dalaraŭ, a z SSD na 512 Hb i bolš mahutnym pracesaram — 1599 dalaraŭ.
Noŭtbuki buduć pastaŭlacca jak u śvietła-šerym i ciomna-šerym, tak i ŭ załacistym korpusie.
Research Kit
Apple pradstaviła nabor dla raspracoŭščykaŭ Research Kit, a taksama piać testavych prahram dla daśledavańniaŭ zdaroŭja, raspracavanych supolna z daśledčymi instytutami.
Chvoryja na dyjabiet, astmu, rak hrudziej ci sardečna-sasudzistyja zachvorvańni ci chvarobu Parkinsona zmohuć dapamahać navukoŭcam u daśledavańni svaich chvarob.
Naprykład, kab prasačyć za zaležnaściu simptomaŭ chvaroby Parkinsona ad fizičnaj aktyŭnaści, karystalniku iPhone treba budzie chutka pastukać dvuma palcami pa ekranie i skazać u mikrafon «a-a-a». Karystalnik sam zmoža abirać, jakim daśledčykam budzie dastupnaja jaho infarmacyja, sama Apple da jaje nie maje dostupu. Samo prahramnaje zabieśpiačeńnie adkrytaje (open-source).
U nastupnym miesiacy nabor Research Kit stanie adkrytym dla raspracoŭščykaŭ — moža źjavicca bolš daśledčych prahram.
