Daśledčyki z Vašynhtonskaha ŭniviersiteta (Sient-Łuis) pierakanalisia, što navat paśla zakančeńnia rekamiendavanaha terminu vykarystańnia harmanalnyja impłantaty dy ŭnutrymatačnyja śpirali nadziejna zaścierahajuć ad ciažarnaści prynamsi jašče na praciahu hoda.
Nazirali žančyn 18-45 hod, pryčym va ŭsich ź ich termin prydatnaści impłantata na pačatku daśledavańnia byŭ nie mienš jak 6 miesiacaŭ. Usie jany byli papiaredžanyja pra imaviernaść zaciažaryć pa zakančeńni rekamiendavanaha termina, ale ciažarnaść nie nastupiła ni ŭ vodnym vypadku vykarystańnia harmanalnaha impłantata, i tolki ŭ adnym vypadku zaciažaryła kabieta z unutrymatačnaj śpirallu.
Daśledavańnie praciahvajecca. Daktary chočuć pierakanacca, nakolki efiektyŭnymi zastanucca impłantaty praz 2 ci 3 hady paśla zakančeńnia rekamiendavanaha termina našeńnia.
U doŭhaterminovaj pierśpiektyvie heta abaznačaje, što žančyny zmohuć lepiej płanavać naradžeńnie dziaciej, praceduru vydaleńnia dy paŭtornaj pastanoŭki impłantata možna budzie paŭtarać nie tak časta, što niasie i ekanamičnyja vyhody. Takaja infarmacyja, daviedzienaja da žančyn, padvysić papularnaść hetaha sposabu zaścierahańnia. Nadziejnaść impłantavanych kantraceptyvaŭ paraŭnalnaja sa sterylizacyjaj – niezapłanavanyja ciažarnaści nastupajuć u mienš čym 1% vypadkaŭ.
Hiniekołahi ZŠA śćviardžajuć, što kantraceptyŭnyja impłantaty jašče nie zavajavali papularnaści ŭ paraŭnańni z «tradycyjnymi» sposabami, takimi jak vyličvańnie najbiaśpiečniejšych dzion albo harmanalnyja tabletki, choć ich raspaŭsiudžanaść raście. Miž tym Suśvietnaja arhanizacyja achovy zdaroŭja paviedamlaje, što 9 z 10 niepažadanych ciažarnaściaŭ źviazanaja z ekanamičnaj niedastupnaściu nadziejnych sučasnych šlachoŭ kantracepcyi.
