Z 4 da 7 studzienia 2015 h. u Minsku na dvuch chakiejnych arenach projdzie XI Kaladny mižnarodny turnir siarod amataraŭ chakieja na pryzy prezidenta Respubliki Biełaruś. Viadoma, što ŭ spabornictvach znoŭ prymie ŭdzieł kamanda Alaksandra Łukašenki. Kiraŭnik Biełarusi zajaŭleny pad pieršym numaram. Ale cikavaja situacyja: Łukašenka – faktyčna adziny pradstaŭnik kamandy, jaki nie maje prafiesijnaha chakiejnaha minułaha.
Siarod partnioraŭ Łukašenki niamała chakieistaŭ, jakija jašče nie skončyli prafiesijnuju karjeru. Jość dyskvalifikavany za dopinh spartsmien. A voś synoŭ i čynoŭnikaŭ niama zusim. Pahladzim, chto ž budzie pradstaŭlać «kamandu №1» na kaladnym turniry.
Siarhiej Šabanaŭ
Hety bramnik u pradstaŭleńniach nie maje patreby. Doŭhija hady jon byŭ pastajannym źmienščykam u zbornaj Biełarusi lehiendarnaha Andreja Miezina. Jeździŭ na prafiesijnyja čempijanaty śvietu i navat na Alimpijadu (2002). Byŭ čempijonam Biełarusi ŭ składach minskich «Civali» i «Junactva». U svaje zusim užo nie junackija 40 hadoŭ Šabanaŭ zastajecca dziejnych chakieistam. Ciapier jon abaraniaje kolery «Dynama-Maładziečna».
Dźmitryj Baskaŭ
U svoj čas hety hałkipier «chadziŭ u pierśpiektyŭnych». Vyklikaŭsia za junijorskuju zbornuju krainy. Ale ŭ darosłym chakiei, na žal, značnych vyšyniaŭ dasiahnuć nie zmoh. Značnuju častku karjery jon pravioŭ u kamandach-anderdohach – «Viciebsku» i «Breście». Tym nie mienš, heta nie pieraškodziła jamu atrymać uznaharodu «Za pracoŭnyja zasłuhi» z ruki Łukašenki. Viadoma ž, adznačany byŭ za hulniu za prezidenckuju kamandu. Ciapier Baskaŭ źjaŭlajecca dyrektaram DIUSŠ minskaha «Dynama».
Siarhiej Staś
Ciažka pavieryć, ale Siarhiej Staś byŭ udzielnikam pieršaha ŭ historyi matča zbornaj Biełarusi pa chakiei. U 1992-m hodzie biełarusy sastupili ŭkraincam – 1:4. Jašče ciažej pavieryć u toje, što Staś-starejšy pa-raniejšamu ŭ vydatnaj formie. U svaje 40 jon daje jašče foru mnohim partnioram u «Homieli». U Stasia była bahataja karjera, jakaja ŭmiaściła ŭ siabie z paŭtuzina kłubaŭ minornych lih ZŠA i vydatnaje rename, jakoje jon zasłužyŭ u čempijanacie Hiermanii. Stasi – heta chakiejnaja dynastyja. U hety vid sporta taksama hulajuć brat Siarhiej Andrej i syn Siarhiej.
Alaksiej Płotnikaŭ
Chakiejnyja azy Płotnikaŭ spaścihaŭ u surovych rasijskich haradach – Ufie i Chabaraŭsku. Paśla čaho hulca zaprasiŭ hrodzienski «Nioman». Płotnikaŭ taksama dziejny chakieist – zusim niadaŭna jon staŭ aŭtaram 600-aj šajby salihorskaha «Šachciora» ŭ čempijanatach Biełarusi. U adnym ź intervju jon kazaŭ, što «hulni za prezidenckuju kamandu niezabyŭnyja».
Jaŭhien Letaŭ
Letaŭ narodžany ŭ Kazachstanie, ale ad 2001 hoda pastajanna žyvie i hulaje ŭ Biełarusi. Praŭda, za hety čas źmianiŭ usiaho dźvie kamandy – «Mahiloŭ» i «Homiel». U 2013-m jon pryniaŭ rašeńnie zaviaršyć karjeru prafiesijnaha chakieista.
Alaksandr Alaksiejeŭ
Jak i Staś, Alaksiejeŭ prymaŭ udzieł u pieršaj hulni nacyjanalnaj zbornaj Biełarusi ŭ 1992-m. Praŭda, kańki na ćvik hety chakieista paviesiŭ našmat raniej. Alaksiejeŭ prymaŭ udzieł u Alimpijadzie 1998 u Nahana. Hulaŭ u Polščy, Hiermanii, Danii.
Aleh Mikulčyk
Nu a hety chakieist u minułym mieŭ dośvied vystupaŭ navat u NCHŁ. U 1995-96 hadach abaronca pravioŭ niekalki dziasiatkaŭ matčaŭ za «Anachajm Majci Daks». Mikulčyk zasłužyŭ sabie słavu žorstkaha, ci navat hrubaha hulca. Zadziracca z takim sabie ŭ škodu. Kolki razoŭ jon pryznavaŭsia samym niedyscyplinavanym chakieistam čempijanatu Rasii (nabiraŭ bolš za ŭsich štrafnych chvilin). Mabyć, inšym chakieistam vychodzić na lod z takim bajcom zusim nie strašna.
Uładzimir Śvita
Karjera hetaha chakieista išła nie nadta jarka. Jana ŭvohule bliziłasia da svajho zaviaršeńnia, pakul u Biełaruś nie pryjechaŭ kanadziec Hlen Chenłan. Mienavita jon zaprasiŭ Śvitu ŭ nacyjanalnuju zbornuju, u składzie jakoj hulec pravioŭ paru niakiepskich čempijanataŭ śvietu.
Alaksiej Citaviec
Ciapier hetaje proźvišča zhadvajecca amal vyklučna ŭ suviazi z kamandaj Łukašenki. U minułym ža Citaviec pahulaŭ za prafiesijnyja biełaruskija i ŭkrainskija kamandy.
Alaksandr Makrycki
Jon zaŭsiody cemientavaŭ abaronu zbornaj Biełarusi pa chakiei. Na rachunku Makryckaha až 152 hulni ŭ švedry z nadpisam Belarus. Pa biełaruskich mierkach – heta byŭ pieršakłasny chakieist.
Alaksandr Radzinski
Pa maładości chakieist niamała pakalasiŭ na minornych lihach ZŠA, ale majsterstva prabicca ŭ NCHŁ tak i nie chapiła. Pahulaŭ za zbornuju za časami Chenłana. U 2012-m padaŭsia za doŭhim rublom u kijeŭski «Sokał», ale załatoje žyćcio va ŭkrainskim chakiei ciahnułasia niadoŭha. Ciapier Radzinski hulaje za žłobinski «Mietałurh».
Alaksiej Strachaŭ
Jašče adzin dziejny chakieist. Vystupaje za CHK «Viciebsk».
Andrej Michaloŭ
U lutym 2013 hoda ŭ kryvi hetaha chakieista znajšli zabaronieny preparat – mietyłhieksanamin. Dopinh-probu ŭ chakieista minskaha «Dynama» ŭziali padčas alimpijskaj kvalifikacyi ŭ Danii, dzie zbornaja Biełarusi sastupiła adzinuju pucioŭku Słavienii. U vyniku Michaloŭ byŭ dyskvalifikavany na dva hady. Abmiežavańni skončacca ŭ sakaviku sioleta. Michaloŭ nie vyklučaje, što moža viarnucca ŭ prafiesijny sport, pakul padtrymlivaje formu ŭ kamandzie Łukašenki.
Aleh Antonienka
Adzin z najlepšych forvardaŭ u historyi biełaruskaha chakieja. Mieŭ mianušku «snajpier na dachu», za toje, što zabivaŭ samyja niejmaviernyja šajby. Vałodaŭ cudoŭnym kiściavym kidkom. U adnym ź intervju raskazvaŭ, što paru razoŭ vychodziŭ u pieršaj piaciorcy razam z Łukašenkam, ale ŭ asnoŭnym hulaje ŭ druhoj piaciorcy.
Vadzim Biekbułataŭ
Chto nie pamiataje lehiendarnuju pieršuju trojku zbornaj Biełarusi pa chakiei kanca 90-ych Skabiełka – Biekbułataŭ – Andryjeŭski? Mienavita Biekbułataŭ addavaŭ pas na Uładzimira Kopacia padčas słavutaj hulni Biełaruś – Šviecyja na Alimpijadzie 2002. Za zbornuju Biełarusi pravioŭ 91 hulniu.
Andrej Astaševič
Mabyć, adziny čałaviek, aproč samoha Łukašenki, jakoha možna nazvać amataram, a nie prafiesijanałam. Chacia Astaševič i pačynaŭ u chakiejnaj škole «Junactva», ale paśla armii vyrašyŭ nie viartacca ŭ prafiesijny sport. U kamandzie Łukašenki jon, strašna padumać, ad 1997 hoda. Ciapier Astaševič dyrektar RCAP «Raŭbičy», jon źjaŭlajecca adnym z samych vynikovych hulcoŭ prezidenckaj zbornaj.
Maksim Słyš
35-hadovy napadajučy minskaha «Junactva». Zaviaršać karjeru chakieista pakul nie źbirajecca.
Hienadź Saviłaŭ
U čempijanatach Biełarusi zakinuŭ bolš za 100 šajb. Prafiesijnuju karjeru zaviaršyŭ. «Ciapier hulaju raz u tydzień. Možna skazać, što chakieja ŭ mianie stolki, kolki treba: nie zasumuješ i nie pieranasycišsia», - kazaŭ jon u adnym ź intervju.
Viačasłaŭ Lisičkin
Samy małady hulec kamandy Łukašenki – jamu 34 hady. Udała vystupaje za hrodzienski «Nioman», ź jakim letaś staŭ čempijonam Biełarusi.
Ściapan Panamaroŭ
Zasłužany majstar sportu Biełarusi (2007). Jašče letaś vychodziŭ na lod u składzie CHK «Viciebsk». Ciapier dziciačy trenier u minskim «Dynama».
Siarhiej Zadzialonaŭ
I hety napadajučy praciahvaje hulniavuju karjeru, vystupajučy za navapołacki «Chimik-SKA». U Siarhiej za žyćcio ŭ chakiei byli vystupy za dobryja biełaruskija i rasijskija kłuby, nacyjanalnuju kamandu.
Pavieł Bieły
Paśpiachovy biznesmen, partnior Łukašenki pa pieršaj trojcy ataki. Jak biznesmen zajmajecca budaŭnictvam i zdačaj pamiaškańniaŭ u arendu. Zrešty, tak było nie zaŭsiody. Pavieł Bieły vielmi dobra pačynaŭ u chakiei, jaho navat nabyŭ ufimski «Sałavat Jułajeŭ», adnak traŭma śpiny nie dała raźviarnucca siarod prafiesijanałaŭ.
Dzianis Maciuchin
Proźvišča hetaha čałavieka ciapier hučyć tolki ŭ źviazcy z kamandaj Łukašenki, ale Maciuchin doŭhi čas vystupaŭ na prafiesijnym uzroŭni.
Aleh Małaškievič
Lehienda hrodzienskaha chakieja. Doŭhija hady chakiejnaha žyćcia jon addaŭ na dabro dla miascovaha «Niomana». Niejak kazaŭ, što dla prezidenckaj kamandy ŭ jaho nie zaŭsiody chapaje času. «Jość tam chłopcy, jakija skončyli hulać zusim niadaŭna, jany pamacniej», - kazaŭ Małaškievič.
Pavieł Mikulčyk
Rodny brat Aleha Mikulčyka. Praŭda, takich pośpiechaŭ na lodzie nie dabiŭsia. Pahulaŭ u ZŠA, Ukrainie, za «Homiel», «Junactva», «Dynama», «Chimvałakno», «Brest».
Siarhiej Šytkoŭski
Pry jahonym udziele adbyvałasia stanaŭleńnie biełaruskaha chakieja. Udzielnik usich pieršych čempijanataŭ śvietu ŭ składzie zbornaj Biełarusi. Bambardzir ad naradžeńnia.
