Nacyjanalny bank Biełarusi rastłumačyŭ bankam, što ažyćcioŭlenyja da 20 śniežnia apieracyi pa kupli valuty pa kartkach nie abkładajucca 30-pracentnym zboram. Adpaviedny list hałoŭny bank krainy nakiravaŭ bankam 24 śniežnia.
Z-za taho što raźliki pamiž bankami ažyćciaŭlajucca na praciahu adnaho-dvuch dzion, u mnohich biełarusaŭ z kart śpisali kamisiju za apieracyi, ažyćcioŭlenyja jašče da ŭvachodžańnia ŭ siłu rašeńnia ab 30-pracentnym zbory.
«Z ulikam zvarotaŭ hramadzian u Nacyjanalny bank pa hetym pytańni tłumačym, što apieracyi kupli zamiežnaj valuty, ažyćcioŭlenyja fizičnymi asobami pry vykarystańni kartak da 20 śniežnia 2014 hoda, pavinny adlustroŭvacca pa rachunkach, da jakich kartki vypuščanyja ŭ abaračeńnie, bieź źbirańnia nazvanaha kamisijnaha zboru», — paviedamili ŭ Nacyjanalnym banku.
Adnak u vypadku kali pry vykarystańni kartki abo jaje rekvizitaŭ vykonvałasia pieraafarmleńnie srodkaŭ, što znachodziacca na biahučych bankaŭskich rachunkach i terminovych bankaŭskich układach (depazitach) u biełaruskich rublach, u zamiežnuju valutu, to kamisijny zbor pavinien prymianiacca da takich apieracyj, ažyćcioŭlenych fizasobami — trymalnikami kartak, z 19 śniežnia.
Zhodna z p. 8 pastanovy praŭleńnia Nacbanka ad 19 śniežnia 2014 hoda № 786 «Ab niekatorych pytańniach funkcyjanavańnia bankaŭ», bankam rekamiendavana zabiaśpiečyć uviadzieńnie kamisijnaha zboru pry kupli fizasobami zamiežnaj valuty ŭ pamiery 30% ad sumy hrašovych srodkaŭ u biełaruskich rublach, jakija padlahajuć vypłacie banku, z 20 śniežnia — pa ŭsich apieracyjach kupli fizičnymi asobami zamiežnaj valuty.
«Takim čynam, z 20 śniežnia kamisijny zbor pavinien vypłačvacca pry praviadzieńni fizičnymi asobami ŭsich apieracyj kupli zamiežnaj valuty, u tym liku tych, što ažyćciaŭlajucca pry vykarystańni bankaŭskich płaciežnych kartak», — adznačyli ŭ Nacbanku.
