Znakamity dacki režysior Łars fon Tryjer pryznaŭsia, što paśla taho, jak staŭ vieści ćviarozy ład žyćcia, jon bolš nie moža zajmacca tvorčaściu.
«Ja nie viedaju, ci zmahu ja zdymać novyja filmy, i heta mianie turbuje, — skazaŭ jon dackaj haziecie Politiken. — Jašče nivodnaje tvorčaje vykazvańnie, jakoje vałodaje mastackaj kaštoŭnaściu, nie zychodziła ad byłoha pjanicy abo byłoha narkamana».
Pa słovach režysiora, usie jaho filmy, akramia apošniaha —»Nimfamanka», byli stvorany pad uździejańniem ałkaholu i narkotykaŭ. Tak, scenar da «Dahvila» jon napisaŭ za čas 12-dzionnaha narkatyčnaha čadu, a na stvareńnie «Nimfamanki» ŭ jaho syšło cełych 18 miesiacaŭ.
Apošnija 90 dzion režysior nie ŭžyvaŭ nijakich adurmańvajučych rečyvaŭ, i kožny dzień chadziŭ na sustreču ananimnych ałkaholikaŭ. Pavodle jaho słoŭ, na dadzienym etapie Łars Tryjer-čałaviek uziaŭ vierch nad Łarsam fon Tryjeram-režysioram (arystakratyčnaja prystaŭka «fon» — častka jaho tvorčaha psieŭdanima).
Režysior vielmi redka daje intervju paśla skandału ŭ Kanach u 2011 hodzie, kali jon na pres-kanfierencyi skazaŭ, što razumieje Hitlera, za što kiraŭnictva kinafiestyvalu zrabiła jaho piersonaj non-hrata.
