Amal kožny ruski, niachaj heta budzie ciomny abo daśviedčany čałaviek, nadzvyčaj adčuvalny da taho, što jon nazyvaje banderaŭščynaj abo ŭkrainskim nacyjanalizmam i što na samaj spravie jość zvyčajnym ŭkrainstvam.
Amal dla kožnaha ruskaha banderaviec abo ŭkrainski nacyjanalist — heta prosta ukrainiec, jaki karystajecca svajoj movaj tak ža niazmušana, jak jon, ruski, — svajoj. Voś na takich ukraincaŭ amal u kožnaha ruskaha — pryrodžanaja alerhija. Jon čuje takoha ŭkrainca za viarstu i, u lepšym vypadku, niedalublivaje jaho.
Jon, ruski čałaviek, a razam ź im i Kreml, nie suprać navat niezaležnaj Ukrainy, kali ŭžo zdaryłasia takaja «hieapalityčnaja katastrofa», pa słovach Pucina, ale niachaj jana, niezaležnaja Ukraina, budzie takoj, jakoj była ŭ składzie SSSR: byccam jana jość, a byccam jaje i niama. Niachaj jana, karaciej, budzie pa maksimumie rusifikavanaj.
Heta i jość usia praŭda pra staŭleńnie ruskich da Ukrainy.
Ruskaha całkam by zadavoliła Ukraina biez ŭkrainstva. Niachaj jana budzie asobnaj, kali zaŭhodna niezaležnaj, dziaržavaj, ale niachaj jana budzie pazbaŭlenaja ŭkrainstva. Amal kožny ruski adrazu, usioj svajoj istotaj, adčuŭ, što pieramožca-Majdan dadaść Ukrainie ŭkrainstva. Pieršymi i vastrej za ŭsich heta adčuli ruskija Kryma. Tut ža nahadali pra siabie krymskija tatary, u čarhovy raz zajaviŭšy, što jany, u adroźnieńnie ad ruskich, ukrainstva — vitajuć. Heta asobnaja i vielmi cikavaja razmova: čamu tatary-krymčaki i ŭkraincy zaadno. Abiedźvie nacyi vydatna viedajuć ruskaha čałavieka, jaki hatovy vitać niezaležnaść i tataraŭ, i čuvašoŭ, i jakutaŭ, i čačencaŭ, aby ich dziaržavy byli pazbaŭlenyja tatarstva, čuvašstva, jakutstva, čačenstva. U bolšaści ruskich heta ŭsio, viadoma, nie ŭ śviadomaści, a ŭ padśviadomaści. Jasnaja pamiać na hety kont u niamnohich, ale hetyja niešmatlikija kirujuć Rasiejaj, jak toj ža ministr zamiežnych spraŭ Łaŭroŭ, chvaravita zacykleny na «Ruskim śviecie».
Ničoha novaha ŭ hetym stanie ruskaj dušy niama.
Heta ŭsio dobra viadoma, daśledavana i abahulniena na prykładzie inšych impierskich narodaŭ, apisana bolš ci mienš udałymi terminami — naprykład, «postimpierski sindrom».
Nahadvaje pra siabie i savieckaje vychavańnie. Kožny ščyra łajalny, idejny, jak tady kazali, saviecki čałaviek luboha plemia ličyŭ, što z časam usie nacyi pavinny abrusieć i što heta budzie dobra. Na siońniašni dzień pry hetaj viery zastajucca tolki ruskija, dy i toje jana ŭ ich dzieści na samym dnie. Bolš vyrazna pryznajecca prahrama-minimum. Jana zychodzić z taho, što čyj by tam ni byŭ nacyjanalizm — akramia ruskaha — na prastorach byłoha SSSR jość zło, tamu što jon viadzie da źmianšeńnia ruskaści, a źmianšeńnia ruskaści nie pavinna być nidzie, a dzie heta nazirajecca, tudy treba pasłać rać, jak vykazaŭsia ŭ vieršy ŭłasnaha sačynieńnia Łužkoŭ.
Čamu davoli łahodna staviacca da dzikunskaha biełaruskaha režymu, niahledziačy na toje, što jon raz-poraz hrubijanić Maskvie? Tamu što jon rastaptaŭ apošnija reštki biełaruskaści. Jak tolki jon zahavaryŭ by pa-biełarusku — vyklikaŭ by lutaść, takuju ž ščyruju, jakuju vyklikaje ŭkrainiec, jaki adčuvaje svajo ŭkrainstva.
Toj, chto choča žyć nie tolki vieraj, ale i viedańniem, pavinien mieć na ŭvazie, što ruskamoŭnyja žychary Ukrainy staviacca da ŭkrainstva našmat spakajniej, čym rasijskija ruskija, vielmi časta — vielmi dobrazyčliva, i raście kolkaść tych, chto vitaje raźvićcio ŭkrainstva sapraŭdy z kranalnym entuzijazmam. Takija ludzi stajali plačom da plača z ukraincami na Majdanie, tam jany razam zmahalisia i hinuli. Jość takija ruskamoŭnyja i ŭ Krymie, ale vielmi mała, choć ich pavoli taksama stanovicca bolš. Astatnija… Dy nie, jany nie bajacca ŭkrainstva. Jany nie dumajuć, što Lutaŭskaja revalucyja pašle na paŭvostraŭ lutych ukrainizataraŭ, nie. Ruskamoŭny Kryma ničoha nie spałochaŭsia, i ništo jaho nie aburyła — usio heta razmovy. Jamu prosta stała niepryjemna, što revalucyja paskoryć ukrainizacyju Ukrainy, što ŭkrainstva adčuje siabie valniej, u bolšaj stupieni doma.
I skažam hałoŭnaje. Nacyjanalnaja ŭkrainskaja sprava z-za padziej u Krymie, jak by jany ni paviarnulisia, nie pacierpić. Naadvarot. Tłumačyć heta — značyć trymać čytača zusim za durnia. Zamach Rasii na Krym tolki nablizić prychod u Maskvu takoha hościa, jak Ruski Majdan. Tłumačyć heta taksama zališnie. Inšaja sprava, što rasiejskaja akupacyja Kryma moža mnohich zabić i abiazdolić. Ludziej škada, navat niakiemlivych, a tak by ŭsio dobra.
