U Barysaŭskim rajonnym sudzie kanviejeram sudziać futbolnych fanataŭ, zatrymanych pierad matčam Biełaruś—Ukraina ŭ Barysavie i paśla jaho.
Niekatorych zatrymali jašče ŭ Minsku, pa darozie na hulniu.
Pra heta paviedamlaje Marjana Kalinina, dziaŭčyna biełarusa Arcioma Baboŭnikava, jakoha taksama zatrymali na vychadzie sa stadyjona buduć sudzić za šalik ź biełaruskaj simvolikaj.
U sudzie prysutničaje ŭkrainski konsuł.
Pavodle źviestak milicyi, było zatrymana 42 asoby. U asiarodku futbolnych fanataŭ nazyvali ličbu bolš za 130 zatrymanych.
Jak paviedamlała karespandentka «Našaj Nivy» ź miescy padziej, častku zatrymanych adpuskali biez składańnia pratakołaŭ. Hetym moža tłumačycca razychodžańnie ŭ ličbach.
Pavodle infarmacyi Football.ua, ukrainskich zaŭziataraŭ zatrymlivali ŭ Barysavie paśla matča zbornaj nibyta za niecenzurnuju łajanku.
Nasamreč, miarkujecca, što jany zatrymanyja za vykanańnie «chita pra Pucina».
Razam z tym jak paviedamlaje karespandent «Našaj Nivy», pa śviedčańni biełaruskich fanataŭ, zatrymana bolš za 30 biełarusaŭ.
Tak, Arcioma Baboŭnikava zabrali za paleńnie fajera, fakt zatrymańnia bačyła i źniała na kamieru karespandentka «Našaj Nivy». Tady jaje taksama zatrymali i vymusili vydalić kadry. Baboŭnikava dastavili ŭ Barysaŭski RAUS.
Zatrymali Uładzia Łobacha z Mazyra, jaki byŭ u bieł-čyrvona-biełym šaliku, jon i paviedamiŭ, što ź im u aŭtazaku 30 čałaviek.
Jość infarmacyja, što dźviuch dziaŭčat-biełarusak zatrymali za ŭkrainskuju simvoliku.
