Lubimy mnohimi akcior, narodny artyst SSSR Aleh Basiłašvili adznačaje 80-hodździe. Hety dzień Aleh Valarjanaviča sustrenie ŭ rodnym Vialikim dramatyčnym teatry imia Hieorhija Taŭstanohava.
Basiłašvili — prosta majstar pieraŭvasableńnia, jon stvaraŭ i praciahvaje stvarać zusim roznyja vobrazy — jak stanoŭčyja, tak i admoŭnyja, choć sam narodny artyst, jaki syhraŭ tolki ŭ teatry bolš za 70 rolaŭ, pryznajecca, što takoha padziełu nie robić. Samachvałaŭ sa «Słužbovaha ramana», Buzykin z «Vosieńskaha marafonu», Rabinin z «Vakzała dla dvaich», Vołand z «Majstra i Marharyty» — śpis zornych i charakternych rolaŭ možna praciahvać biaskonca.
Teatram Aleh Valarjanavič «zachvareŭ» jašče ŭ dziacinstvie. Sa škoły, dzie nie ładzilisia spravy z dakładnymi navukami, budučy artyst źbiahaŭ u Mastacki teatr. Mienavita tamu, kali Aleh pastupiŭ u škołu-studyju MCHAT, taki vybar nikoha nie ździviŭ.
Dziakujučy Taćcianie Daroninaj, ź jakoj Basiłašvili ažaniŭsia jašče jak student, maładoha čałavieka pryniali ŭ trupu leninhradskaha Vialikaha dramatyčnaha teatra im. Horkaha. Ale pražyŭšy vosiem hadoŭ, muž i žonka raźvialisia, Daronina źjechała ŭ Maskvu, a Basiłašvili zastaŭsia. I ŭžo z druhoj pałovy 1960-ch hadoŭ staŭ adnym ź viadučych aktoraŭ teatra.
U kino Aleh Basiłašvili debiutavaŭ ŭ 1956 hodzie z rolaj Andreja Andrejeviča ŭ filmie «Niaviesta». Ale zornymi stali kaniec 70-ch — pačatak 80-ch hadoŭ, kali narodnuju słavu akcioru prynieśli roli ŭ filmach Eldara Razanava («Słužbovy raman», «Vakzał dla dvaich») i Hieorhija Danielija («Vosieński marafon»).
Darečy, na scenie BDT Aleh Valarjanavič trojčy adyhraŭ u pastanoŭkach viadomaha biełaruskaha režysiora Mikałaja Pinihina. Stvaryŭ jarkija vobrazy ŭ śpiektaklach «Kalifarnijskaja siuita», «Kaściumier» i «Kvartet».
Aleh Basiłašvili uznaharodžany ordenam «Za zasłuhi pierad Ajčynaj» 3, 4 stupieni, ordenam «Družby», ordenam «Pracoŭnaha Čyrvonaha Ściaha», ordenam «Mira». Jon nosić zvańni zasłužanaha artysta RSFSR, narodnaha artysta RSFSR i SSSR, źjaŭlajecca hanarovym členam Rasijskaj akademii mastactvaŭ, hanarovym hramadzianinam Tbilisi i Sankt-Pieciarburha. Uładalnik Dziaržpremii RSFSR imia bratoŭ Vasiljevych.
Hladzicie taksama: Basiłašvili pra padziei va Ukrainie: Rasija ciapier maje voraha na ŭsie stahodździ
