Hrošy byli vydatkavanyja ŭ miežach kantrolnaj zakupki kantrafaktnaha ałkaholu.
Jak stała viadoma pradstaŭnikam Kamiteta dziaržkantrolu, nie majučy naležnaj dziaržaŭnaj rehistracyi, udzielniki hrupy, jakuju ŭznačalvaŭ žychar Pinskaha rajona, sa studzienia pa vierasień 2014 hoda nabyvali ŭ Rasii ałkaholnuju pradukcyju, uvozili jaje ŭ Biełaruś i pradavali na terytoryi Pinskaha i Łuninieckaha rajonaŭ. Pavodle najaŭnych źviestak, ałkahol mieŭ prykmiety kantrafaktnaj pradukcyi. Jana raspaŭsiudžvałasia pa ŭsioj Bresckaj vobłaści, što stvarała pahrozu biaśpiecy zdaroŭja spažyŭcoŭ.
Pa vyjaŭlenych faktach Pinskim mižrajadździełam finansavych rasśledavańniaŭ raspačata kryminalnaja sprava pa prykmietach złačynstva, praduhledžanaha č.3 art.233 Kryminalnaha kodeksa Respubliki Biełaruś «niezakonnaja pradprymalnickaja dziejnaść».
Hetamu papiaredničała praviedzienaja z udziełam supracoŭnikaŭ AMAP UUS Bresckaha abłvykankama «pravieračnaja zakupka» na sumu bolš za 14 tysiač dalaraŭ va ŭdzielnikaŭ arhanizavanaj złačynnaj hrupy.
U vyniku ŭ złačyncaŭ byli kanfiskavanyja elitnyja ałkaholnyja napoi impartnych marak (harełka, viski, kańjak i rom). Ahulny abjom kanfiskavanaha śpirtnoha koštam zvyš 1,7 miljardaŭ rubloŭ skłaŭ 7 137,8 litra.
Fihuranty pa spravie zatrymanyja. Nakładzieny aryšt na lehkavy i hruzavy aŭtatranspart padazravanych koštam 610 miljonaŭ rubloŭ. U ciapierašni čas pravodziacca dalejšyja śledčyja i pracesualnyja dziejańni.
