Minharvykankam nakiravaŭ u kancern «Biellehpram» list pad hryfam «DSP» ź vielmi niezvyčajnymi ŭkazańniami.
Nie budziem cytavać uvieś dakumient dasłoŭna, zaznačym tolki, što kancernu «Biellehpram» pradpisvajecca zabiaśpiečyć praviadzieńnie ŭ samy bližejšy čas pasiadžeńnia naziralnaha savieta SP ZAT «Miłavica», «dla abmierkavańnia miechanizmu ŭvachodžańnia Minharvykankama ŭ skład udzielnikaŭ tavarystva». Pry hetym u dakumiencie idzie spasyłka na adpaviednaje daručeńnie premjer-ministra Michaiła Miaśnikoviča, piša «Ježiednievnik».
U Minharvykankamie ŭžo paćvierdzili, što dakumient realny, choć i hučyć trochi fantastyčna, asabliva z pastaŭlenym hryfam «DSK».
Jašče bolš fantastyčna heta vyhladaje ŭ śviatle taho, što jak raz 17 vieraśnia SP ZAT «Miłavica» pradstaviła pieršy ŭ lohkaj pramysłovaści Biełarusi łahistyčny centr. Jak zajaviła na adkryćci centra načalnica ŭpraŭleńnia kaardynacyi raźvićcia trykatažnaj i šviejnaj halin kancerna «Biellehpram» Alena Kucharava, «Miłavica» — heta pradpryjemstva, jakoje zaŭsiody dynamična raźvivajecca, heta zaŭsiody inavacyjnyja technałohii».
«Miłavica» zaŭsiody na paŭkroku idzie napieradzie astatnich. Heta pradpryjemstva, jakoje maje samuju vysokuju zarabotnuju płatu ŭ lohkaj pramysłovaści. Siońnia jano pradstaŭlaje svoj prajekt u halinie łahistyki. Heta pieršy i pakul adziny padobny prajekt u lohkaj pramysłovaści Biełarusi», — uračysta skazała Alena Kucharava.
Pavodle źviestak kancerna «Biellehpram», «Miłavica» ŭ abjomie vytvorčaści kancerna zajmaje kala 9%, pavodle abjomu ekspartu — kala 12%. Pryrost čystaha prybytku pradpryjemstva pavodle vynikaŭ 8 miesiacaŭ 2014 skłaŭ 22,7% da anałahičnaha pieryjadu 2013 hoda. «Heta vielmi dobryja i vielmi vialikija ličby», — kanstatavała Alena Kucharava.
U śviatle ŭsich hetych źviestak dziejańni biełaruskich uładaŭ, jakija pačali sakretnuju apieracyju pa nacyjanalizacyi paśpiachovaha pradpryjemstva, niezrazumiełyja i ŭ vyšejšaj stupieni niełahičnyja.
Tolki na dniach dziaržava pradała za 39 młrd rubloŭ svoj pakiet akcyj u AAT «Bieraściejski pančošny kambinat» pryvatnamu pradpryjemstvu STAA «Konte SPA», a tut raptam navažyła ŭ režymie sakretnaści viarnuć pad kantrol «Miłavicu» i, miakka kažučy, pakryŭdzić bujnych zamiežnych inviestaraŭ. Bo asnoŭnym uładalnikam «Miłavicy» źjaŭlajecca kampanija Silvano Fashion Group (SFG), čyje akcyi kacirujucca na Talinskaj i Varšaŭskaj biržach. Tam užo kala 2 tysiač akcyjanieraŭ, siarod jakich polskija piensijnyja i inviestycyjnyja fondy, a taksama klijenty šerahu bujnych jeŭrapiejskich bankaŭ. Heta ŭžo nie prosta adnaho zamiežnaha biznesoŭca pakryŭdzić, a kudy bolš surjozna.
U Minharvykankamie, jaki nakiravaŭ u kancern sakretnaje rasparadžeńnie, taksama nie zmahli patłumačyć, navošta dziaržavie brać pad kantrol pradpryjemstva, jakoje paśpiachova raźvivajecca. «Vy što, chočacie, kab my čakali, kali tam usio abryniecca?» — zadali tam sustrečnaje pytańnie.
Čamu «tam pavinna ŭsio abrynucca», kali kancern nazyvaje «Miłavicu» lidaram haliny, jaki na paŭkroku idzie napieradzie ŭsich astatnich, u Minharvykankamie taksama nie rastłumačyli. Zamiest adkazu znoŭ zahučała sustrečnaje pytańnie: «A vy možacie dać harantyi, što tak nie adbudziecca?»
Inšymi słovami, dziaržava navažyła ŭziać pad kantrol «Miłavicu» prosta tak, na ŭsialaki vypadak, kab, nie daj Boh, tam čahości nie adbyłosia.
U śviatle ŭsioj hetaj infarmacyi, vielmi małavierahodna, što ŭvieś hety sakretny prajekt u nacyjanalizacyi «Miłavicy» sapraŭdy maje na mecie abaronu dziaržaŭnych intaresaŭ. Dziaržava ad hetaha nie atrymaje ničoha, a voś stracić vielmi mnohaje. Chutčej za ŭsio, heta prajekt niejkaha kankretnaha čynoŭnika, jaki viadzie ŭłasnuju hulniu, prykryvajučysia dziaržaŭnymi intaresami.
Staršynia praŭleńnia Silvano Fashion Group (SFG) Mert Mieeryts i hienieralny dyrektar SP ZAT «Miłavica» Normund Azalinš pakul nijak nie kamientujuć situacyju. Jany navat nie paćviardžajuć (ale i nie źniapraŭdžvajuć) najaŭnaść sakretnaha rasparadžeńnia Minharvykankama. Adnak, miarkujučy pa ich niervovaj reakcyi na pytańnie, jany ŭžo viedajuć pra raspačaty praces nacyjanalizacyi paśpiachovaha biełaruskaha pradpryjemstva. Pa ŭsioj bačnaści, SFG pakul nie choča spalvać za saboj masty i sprabuje raźviazać pytańnie dypłamatyčnymi sposabami.
Ale, jak paviedamili ŭ Minharvykankamie, praces nacyjanalizacyi ŭžo idzie poŭnym chodam.
Dla heta budzie zadziejničany miechanizm Ukaza prezidenta №677 ad 16 listapada 2006, u jaki ŭ 2011 hodzie byli ŭniesieny istotnyja źmieny, jakija dajuć Minharvykankamu pieravažnaje prava na nabyćcio akcyj (dolaŭ u statutnych fondach) haspadarčych tavarystvaŭ, uklučanych u pieralik jurydyčnych asob, jakija zabiaśpiečvajuć funkcyjanavańnie stratehična značnych halin ekanomiki. Uličvajučy, što Minharvykankam ciapier u režymie strohaj sakretnaści sprabuje damovicca ź jakimi-niebudź minarytarnymi akcyjanierami ab kupli akcyj SP ZAT «Miłavica», možna mierkavać, što navat FSG pra heta nie viedaje. Dziaržavie hałoŭnaje ŭvajści ŭ skład udzielnikaŭ, a potym naraścić svaju dolu budzie dastatkova prosta. Ale znoŭ ža niezrazumiełyja matyvy ŭsich hetych dziejańniaŭ.
U Biełarusi ŭžo nie raz byvali situacyi, kali dziaržava brała pad kantrol prablemnyja pradpryjemstvy, ale hetyja dziejańni choć i vyklikali abureńnie zadziejničanymi miechanizmami, usio ž byli zbolšaha zrazumiełyja. Adnak «Miłavica» jak raz nie prablemnaje pradpryjemstva, a lidar haliny i honar krainy. Mienavita tamu sakretnaja apieracyja bolš padobnaja na sprobu rejdarskaha zachopu, čym na realny kłopat dziaržavy pra los znakamitaha biełaruskaha pradpryjemstva. Zastałosia tolki zrazumieć, chto kiruje ŭsim hetym pracesam?
Bo sprava navat nie ŭ tym, ci ŭvojdzie ŭ skład SP ZAT «Miłavica» Minharvykankam ci nie.
Sam fakt, što dziaržava bieź jakich-niebudź surjoznych padstaŭ, prosta na ŭsialaki vypadak, uvachodzić u akcyjanierny kapitał pryvatnaha pradpryjemstva z zamiežnymi inviestycyjami, budzie krasamoŭna śviedčyć pra toje, što ŭ krainie bolš nie dziejničajuć nijakija harantyi zachavańnia pravoŭ ułasnaści.
Dziaržava prosta piarojdzie rysu, za jakoj joj bolš nichto nikoli nie pavieryć. Navat znakamitaja Dyrektyva prezidenta №4, u p.2.1 jakoj skazana «harantavać dobrasumlennym nabytčykam majomaści zachavańnie pravoŭ ułasnaści i karystańnia hetaj majomaściu», stracić svaju vahu.
U takoj situacyi straty krainy budzie składana navat pryblizna padličyć.
