Ukraina nie budzie ŭdzielničać u mižnarodnym muzyčnym konkursie «Jeŭrabačańnie-2015». Takoje rašeńnie pryniała Nacyjanalnaja telekampanija Ukrainy razam ź Jeŭrapiejskim viaščalnym sajuzam (EBU).
Pra heta paviedamlaje pres-słužba NTKU.
NTKU tłumačyć svajo rašeńnie składanaj situacyjaj u krainie, a taksama tym, što ciapier na padobnyja zabavy banalna niama srodkaŭ.
NTKU spadziajecca, što Ukraina nie budzie ŭdzielničać u konkursie tolki na praciahu adnaho hoda.
«My razumiejem, što «Jeŭrabačańnie» — heta imidžavy prajekt, prestyž. Ale my nie majem prava rabić niešta drenna. A na «dobra» u nas banalna niama hrošaj. Kali ŭ kahości jość žadańnie dapamahčy — my budziem tolki rady, ale samastojna taki prajekt, bajusia, my nie vyciahniem. Tamu było pryniata takoje rašeńnie», — prakamientavaŭ situacyju hienieralny dyrektar NTKU Zurab Ałasanija.
Akramia taho bolšaść viadomych artystaŭ zapeŭnili pradstaŭnikoŭ NTKU, što zaraz admovilisia b ad udziełu ŭ «Jeŭrabačańni».
«My railisia z mnohimi artystami, i jany skazali, što nie prymali b udziełu ŭ konkursie vyklučna pa tych matyvach, što zaraz nie čas dla viesiałości. I srodki, jakija byli b vydatkavanyja na praviadzieńnie ŭkrainskaha nacadboru «Jeŭrabačańnie-2015», bolš metazhodna nakiravać na važniejšyja patreby», — adznačyŭ adzin z pradziusaraŭ NTKU Uład Bahinski.
Nahadajem, «Jeŭrabačańnie-2015» adbudziecca ŭ stalicy Aŭstryi — Vienie 19, 21 i 23 maja 2015 hoda.
