U Biełaruskaj pravasłaŭnaj carkvie mohuć być utvorany novyja jeparchii. Ab hetym paviedamiŭ 17 vieraśnia žurnalistam u Breście mitrapalit Minski i Słucki, patryjaršy ekzarch usiaje Biełarusi Pavieł paśla sustrečy z kiraŭnictvam Bresckaj vobłaści.
«My budziem u najbližejšy čas vychodzić z takoj inicyjatyvaj. Ja dumaju, što śviaciejšy patryjarch i Śviaščenny sinod nas padtrymajuć, — skazaŭ kiraŭnik BPC. — Heta daść mahčymaść na miescach archirejam bližej być da prychadžan, da śviataroŭ».
Mitrapalit Pavieł adznačyŭ, što mienavita tamu pa rašeńni patryjarcha Maskoŭskaha i ŭsiaje Rusi Kiryła, padtrymanaha Śviaščennym sinodam i archirejskim saboram, siońnia ŭtvarajucca novyja jeparchii, novyja mitrapolii. Z bujnych jeparchij vydzialajucca novyja.
Kiraŭnik BPC vysoka acaniŭ układ uładyki Fiłareta ŭ raźvićcio Biełaruskaj pravasłaŭnaj carkvy. «Uładyka Fiłaret zrabiŭ šmat. Bo ŭ saviecki čas u Biełarusi byŭ tolki adzin archirej. Ciapier — 13. Ale heta jašče nie miaža», — padkreśliŭ mitrapalit Pavieł.
U chodzie sustrečy kiraŭnik Bresckaj vobłaści Kanstancin Sumar adznačyŭ važnuju rolu carkvy ŭ duchoŭnym vychavańni hramadstva i skazaŭ, što kožny novy chram, jak i novaja škoła, stvaraje peŭnuju aŭru, daje pazityŭny impuls u žyćci rehijonu.
Na mierapryjemstvie paviedamlałasia, što, pavodle źviestak manitorynhu, 80% apytanych viernikaŭ vobłaści nazyvajuć siabie pravasłaŭnymi. Na terytoryi Bresckaj jeparchii zarehistravana 205 prychodaŭ (ź ich 16 — u Breście). U vobłaści dziejničaje 180 cerkvaŭ, jašče 23 — budujucca, adradžajecca manastyrskaje žyćcio, stvarajucca niadzielnyja škoły.
Dapoŭnim, što sustreča ŭ abłvykankamie adbyłasia ŭ miežach vizitu mitrapalita Paŭła ŭ Brest 17—19 vieraśnia, prymierkavanaha da dnia šanavańnia prapadobnamučanika Afanasija Bresckaha, jaki adznačacca 18 vieraśnia.
17 vieraśnia mitrapalit Pavieł uznačaliŭ usianočnuju ŭ Śviata-Simiaonaŭskim kafiedralnym sabory, a 18 vieraśnia voźmie ŭdzieł u tradycyjnym chresnym chodzie i praviadzie liturhiju ŭ Afanaśjeŭskim mužčynskim manastyry.
Prahramaj vizitu taksama zapłanavany naviedvańnie kiraŭnikom BPC Rastvo-Baharodzičnaha žanočaha manastyra, sustrečy z duchavienstvam Bresckaj jeparchii, pradstaŭnikami siastryctvaŭ miłasernaści i maładziožnych bractvaŭ, z asabovym składam Bresckaj pahraničnaj hrupy, naviedvańnie centra miedycynskaj reabilitacyi dla dziaciej ź psichanieŭrałahičnymi zachvorvańniami «Tonus».
