Pieramovy z RF pa ŭrehulavańni situacyi na ŭschodzie Ukrainy pavinny adbyvacca pry ŭdziele Ukrainy, RF i pradstaŭnikoŭ ZŠA i ES.
Pra heta na kanfierencyi YES, jakaja prachodzić u Kijevie, zajaviŭ premjer-ministr Ukrainy Arsień Jacaniuk.
Kažučy pra damoŭlenaści z RF ab pieramirji i ŭrehulavańnie na ŭschodzie Ukrainy, Jacaniuk adznačyŭ:
«Dvuchbakovyja damoŭlenaści i pieramovy z RF — nie lepšaja ideja».
«Ja za «ženieŭski farmat» z udziełam ES, ZŠA i RF. My nie takija mocnyja, kab vieści pieramovy na dvuchbakovaj asnovie. Rasiejcy nas prosta pierahulvajuć, jany hetaha chočuć. Pucin choča, kab źjaviŭsia jašče adzin zamarožany kanflikt», — adznačyŭ Jacaniuk.
Razam z tym na pytańnie, ci mahčyma, što Jacaniuk z Parašenkam niapravilna acanili situacyju padčas vajennaha kanfliktu i pavieryli, što siły Ukrainy zmohuć supraćstajać prarasiejskim siłam, Jacaniuk adznačyŭ:
«Mnie vyrazna zrazumieła, jakaja kančatkovaja meta Pucina — jon imkniecca nie prosta ŭziać Danieck i Łuhansk, jon imkniecca ŭziać usiu Ukrainu, jon choča adnavić Saviecki Sajuz».
«Jon choča zachapić Danieck i Łuhansk, a adtul — zrabić kalidor u Adesu, Chierson i Prydniastroŭje», — dadaŭ jon.
Pry hetym Jacaniuk zajaviŭ, što NATA źjaŭlajecca adzinaj mahčymaściu abaranić Ukrainu, adnak jon ličyć, što Ukraina ŭ karotkaterminovaj pierśpiektyvie nie stanie siabram NATA.
«U karotkaterminovaj pierśpiektyvie NATA nie hatova pryniać Ukrainu», — adznačyŭ premjer.
Pa słovach Jacaniuka, pierad Ukrainaj niekalki klučavych vyklikaŭ, pieršy ź jakich — vajna.
«Rasija viadzie vajnu z Ukrainaj nie tolki vajennymi srodkami, ale i sacyjalnymi, ekanamičnymi i palityčnymi. Druhi vyklik — enierhietyčnaja halina… Maja acenka takaja — vielizarnyja vykliki, vialikija prablemy, ale i vialikija mahčymaści. Naš abaviazak — zabiaśpiečyć źmieny ŭ krainie», — adznačyŭ Jacaniuk.
Taksama jon adznačyŭ, što Ukraina zmoža pryciahvać inviestaraŭ, kali «spynić vajnu z RF».
«Kali my spynim vajnu, spynim Rasiju, u nas budzie šaniec pryciahnuć mižnarodnych inviestaraŭ. Niaprosta heta rabić, kali ŭ vašaj krainie — rasijskija tanki i artyleryja», — dadaŭ jon.