Dźvie novyja knihi dla dziaciej vyjšli ŭ sieryi «Kalarovy rovar» Biblijateki Sajuza biełaruskich piśmieńnikaŭ. Jany abjadnanyja imieniem aŭtarki — šviedskaj mastački, ilustratarki i piśmieńnicy Sary Łundbierh, i hałoŭnaj hierainiaj abiedźviuch historyj, jakuju zavuć Vita Biełaja Kreska.
Pa-biełarusku hetyja tvory zahučali dziakujučy pierakładčycy Nadziei Kandrusievič.
Sara Łundbierh pačynała jak mastačka-afarmlalnica dziciačaj litaratury, i adna z knih ź jaje malunkami atrymała ŭ 2009 hodzie šviedskuju prestyžnuju premiju Aŭhusta.
Tady ž vyjšła kniha «Vita Biełaja Kreska», dzie Sara vystupaje ŭ roli piśmieńnicy i mastački adnačasova. Hetaja kniha raspačała sieryju knih pra dziaŭčynku Vitu, jakaja maluje kreski na darohach.
U pieršaj historyi Sara Łundbierh znajomić čytačoŭ ź dziaŭčynkaj Vitaj, jakaja dapamahaje chłopčyku pierajści darohu i maluje piešachodny pierachod. Kniha aformlenaja jarka, niezvyčajna i simvalična.
Druhoje vydańnie «Vita Biełaja Kreska i Ejvind» (2011) Sara Łundbierh azdablaje jašče bolš detalova. Heta historyja pra toje, jak u Vity źjaŭlajecca siabar Ejvind, ale amal adrazu ž źnikaje, i Vita vypraŭlajecca jaho šukać.
U 2013 źjaviłasia treciaja kniha pra Vitu, «Ejvind i kraj śvietu», jakaja pakul što nie pierakładzienaja na biełaruskuju.
«Pierakładać sieryju zaŭsiody cikava, bo naziraješ, jak mianiajucca nie tolki piersanažy historyi, ale časam i piśmieńnica razam ź imi, jaje styl apaviadańnia. Bo pieršaja kniha pra Vitu napisanaja ŭ bolš piedahahičnaj maniery, a ŭ druhoj i treciaj knizie Sara Łundbierh uzdymaje bolš fiłasofskija pytańni, vykarystoŭvaje kantrastnyja detalnyja vobrazy, jak u apisańni, tak i ŭ malunkach.
Asablivaściu knih Sary Łundbierh ja b nazvała toje, što tekst i ilustracyi žyvuć adnym žyćciom, jany ruchajucca razam i źjaŭlajucca niby praciaham adno adnaho. I było cikava sačyć za hetym rucham, za suhučnaściu słoŭ i malunkaŭ i pieradavać heta ŭ pierakładzie», — raspaviadaje Nadzieja Kandrusievič.
Vydańni «Vita Biełaja Kreska» i «Vita Biełaja Kreska i Ejvind» možna znajści ŭ minskich kramach «ŁohvinaŬ» (Pr. Niezaležnaści, 37a) i «Viedy» (vuł. K. Marksa, 36). U chutkim časie jany buduć dastupnyja ŭ inšych kniharniach — staličnych i pa ŭsioj Biełarusi. Cikaŭciesia!