Ukraina płanuje pabudavać «Ścianu» na miažy z Rasijaj da kanca 2015 hoda.
Pra heta paviedamiŭ pres-sakratar infarmacyjna-analityčnaha centra RNBA Andrej Łysienka siońnia na bryfinhu ŭ Kijevie.
«Pa daručeńni prezidenta Ukrainy Dziaržpahransłužba padrychtavała Płan mierapryjemstvaŭ pa pabudovie achovy ukrainska-rasijskaj miažy i administracyjnaj miažy z AR Krym», — adznačyŭ jon.
«Realizacyja Płana budzie ažyćciaŭlacca na praciahu 2014 — 2015 hadoŭ», — paviedamiŭ jon.
Pavodle słoŭ Łysienki, dakumient uklučaje miery pa inžynierna-techničnym ŭładkavańni miažy, adnaŭleńni punktaŭ propusku i raźvićci padraździaleńniaŭ i ŭdaskanaleńni pravavoha rehulavańnia pytańniaŭ achovy miažy.
Pres-sakratar RNBA nahadaŭ, što 5 vieraśnia Płan byŭ zaćvierdžany rašeńniem Kabinieta ministraŭ, a 10 vieraśnia razhladaŭsia na pašyranym pasiadžeńni Urada. Vykanańnie prajekta budzie ažyćciaŭlacca ŭ dva etapy.
«Na pieršym buduć uładkavanyja ŭčastki, raźmieščanyja pa-za zonaj aktyŭnych bajavych dziejańniaŭ, — u miežach Čarnihaŭskaj, Sumskaj, Charkaŭskaj abłaściej, a taksama častkova Danieckaj i Łuhanskaj; suchaputnaha ŭčastka administracyjnaj miažy z AR Krym; ŭźbiarežža Azoŭskaha mora, a taksama pa druhim rubiažy achovy ŭzdoŭž linii raźmiežavańnia», — raspavioŭ Łysienka, dadaŭšy, što «na druhim etapie paśla razzbrajeńnia niezakonnych farmavańniaŭ i adnaŭleńnia linii miažy praduhledžana ŭładkavańnie astatniaha ŭčastka ŭ miežach Danieckaj i Łuhanskaj abłaściej».
«Inžyniernaje ŭładkavańnie ukrainska-rasijskaj miažy i administracyjnaj miažy z AR Krym praduhledžvaje ziemlanyja i bietonnyja vały, kantrolna-śledavyja pałosy, sistemy optyka-elektronnaha nazirańnia, sihnalizacyjnyja kompleksy, rakadnyja darohi i fartyfikacyjnyja zbudavańni dla pieraškody ruchu aŭtamabilnaj techniki i ludziej», — zajaviŭ jon.
Pavodle jaho słoŭ, na račnym i marskim učastkach — sistemy optyka-elektronnaha nazirańnia i aśviatleńnia nadvodnaj abstanoŭki, ustalavańnie nahladalnych viežaŭ, kompleksnych fartyfikacyjnych zbudavańniaŭ z metaj niedapuščeńnia vysadki desantu. Finansavańnie mier Płana budzie ažyćciaŭlacca za košt biudžetu, pazabiudžetnych srodkaŭ i srodkaŭ mižnarodnaj techničnaj dapamohi.
