Staŭka arendy ŭ dziaržaŭnym arendnym žylli ŭ Biełarusi budzie składać pryblizna 50% ad rynačnaj, paviedamiŭ namieśnik premjer-ministra Anatol Kalinin, adkazvajučy na pytańnie 9 vieraśnia ŭ ramkach adkryćcia budaŭničaj vystavy ŭ Minsku.
«Što datyčycca cany pytańnia, to jana budzie ŭstanoŭlena na ŭzroŭni ŭrada, ale jana budzie nižejšaj, čym rynačnaja. Na rynku prapanoŭvajecca hałoŭnym čynam arendnaje žyllo z meblaj. My ž prapanoŭvajem žyllo biez mebli. Tut jość pytańnie akupnaści damoŭ. Va ŭsim śviecie srodki, vydatkavanyja na budaŭnictva, dzielacca na pieryjad akupnaści, na 20 hadoŭ, i atrymlivajecca cana. My ž u ramkach sacyjalnaj abarony nasielnictva idziem pa inšym šlachu, šlachu mahčymaściaŭ nasielnictva. Rynak arendy žylla stvorany. My płanujem staŭku ŭ miežach 50% rynačnaha koštu. Ale kančatkovuju sumu i padychody my nazaviem u kancy biahučaha tydnia», — skazaŭ Kalinin.
Jon nahadaŭ, što 8 vieraśnia adbyŭsia dakład u kiraŭnika dziaržavy, dzie «byli pastaŭleny peŭnyja zadačy». «Što datyčycca padychodaŭ, jakija pavinny być pa daručeńni kiraŭnika dziaržavy vypracavany ŭradam, to jany buduć zrobleny na praciahu hetaha tydnia. My paznačym cenavy dyjapazon, umovy, kryteryi, chto i jak budzie atrymlivać arendnaje žyllo», — paviedamiŭ namieśnik kiraŭnika ŭrada.
Pavodle słoŭ Kalinina, arendnaje žyllo składaje značnuju dolu ŭ ahulnym abjomie budaŭnictva žylla. «Sioleta my płanujem pabudavać 330 tys. kvadratnych mietraŭ suprać 30 tys. u minułym. Taki voś abjom i dynamika. Pa vynikach paŭhodździa my nablizilisia da 100 tys. kvadratnych mietraŭ», — skazaŭ jon.
Namieśnik premjer-ministra padkreśliŭ, što z budaŭnictvam arendnaha žylla ŭ Biełarusi stvarajucca ŭmovy dla svabodnaha pieramiaščeńnia maładych kadraŭ pa krainie, u zaležnaści ad miesca pracy. «Dzie jość praca, tam jość žyllo. Heta novy vid pasłuh u žyllovaj palitycy, jaki dazvalaje ruchacca bolš dynamična», — ličyć Kalinin.
Vice-premjer paviedamiŭ, što naviedaŭ čatyry damy ŭ kompleksie «Mahistr» u Minsku. «Pavinien skazać, što ŭzrovień vysoki. Nijakich niama pretenzij da jakaści budaŭnictva, pamiaškańni ŭsio vyčyščany, vokny vymyty, ustanoŭlena sučasnaje inžyniernaje abstalavańnie, pryjazdžaj i žyvi», — adznačyŭ Kalinin.
