Prychilniki vychadu Šatłandyi sa składu Złučanaha Karaleŭstva, pa dadzienych instytuta daśledavańnia hramadskaj dumki YouGov, apynulisia ŭ bolšaści, apiaredziŭšy tych, chto vystupaje za zachavańnie adzinaj dziaržavy, na 2% (51% suprać 49%). Takim čynam, prychilniki niezaležnaści ŭpieršyniu vyrvalisia napierad u hetaj honcy.
Pa pryznańni kiraŭnika kampanii za adździaleńnie Šatłandyi ad Złučanaha Karaleŭstva Błer Dženkins, niahledziačy na toje, što, pa apytańni YouGov, jaho adnadumcy vyjšli napierad, pa inšych apytańniach, jany znachodziacca ŭ mienšaści. «Z hetaha momantu i až da 18 vieraśnia my budziem pracavać nie pakładajučy ruk, kab pieramahčy», — adznačyŭ jon.
Refierendum pa pytańni ab niezaležnaści Šatłandyi pavinien adbycca 18 vieraśnia 2014 hoda. U vypadku, kali bolšaść nasielnictva prahałasuje za vychad sa składu Złučanaha Karaleŭstva, Šatłandyja stanie niezaležnaj dziaržavaj, choć i zastaniecca ŭ asabistaj unii ź Vialikabrytanijaj. Surjoznyja dyskusii vyklikaje pytańnie ab valucie: kali šatłandskaje kiraŭnictva choča pakinuć zvykły funt sterlinhaŭ, to brytanskaje ministerstva finansaŭ vystupaje kateharyčna suprać hetaha.
